LECCIÓN 42
Bi rnhe Biblia ki tan suarha towelazarha lhen ki tan ktzaganarha
Bala beneʼ rnheke kuenda suarha yatzayolaj rhala ktzaganarha. Sanlhe laga yogothe beneʼ notzaganake zuake yatzayolaj lhen laga yogothe beneʼ zuake towelazake zuayeechike. Biblia rnhe tan suarha towelazarha kaʼ tan ktzaganarha naka to ta rhona kierha Dios.
1. Bi banheza siʼrha cheʼ ku ktzaganarha
Biblia rnhe: «Beneʼ rtzaganeʼ rhonhe chhiaʼ, sanlhe beneʼ be ktzaganeʼ gontekarhe chhiaʼ» (blaba 1 Corintios 7:32, 33, 38). Taní rhenheinhe, beneʼ zuake towelazake be rhebankene nákaʼ uyoke beneʼ kieke o nigolha kieke. Lhekaʼ napakarhe másrhe lataj. Yebalake rhon yolaj gonke chhin ki Jeobá, kanho, rheajke gayobla dzatzalajke rson chhiaʼ ki Dios. Lhen banheza mástherhe chhiaʼ ki ka beneʼ be notzaganake naka tan rhon yolajzi kueajke lataj na suake másrhe gago lhen Jeobá.
2. Bi banheza rziʼ beneʼ rhonke guichi kieke katiʼ rtzaganake
Beneʼ rtzaganake lhezekan rziʼke banheza. Lo Biblia rnhe «chhiarhe naka chopake kasla tozeʼ» (Eclesiastés 4:9). Lhen kanse naka, másrhe cheʼ beneʼ notzaganake rhonke kaʼ rnhe lo Biblia. Beneʼ rhonke guichi kieke katiʼ rtzaganake rkiebike yekekene, gonke balaʼn lhen uyolezaake chhiadodi. Lhekaʼ rlerha zuakarhe chhiaʼ kasla beneʼ ku nonke guichi. Lé lhezekan rde lataj gzenike chhiaʼ bin kieke lhen gonchiʼke lhekabi.
3. Bi rhon kuenda Jeobá ki beneʼ rtzaganake
Katiʼ Jeobá btzague naaʼ Adán lhen Eva, gneʼ: «Benebguioʼ ksanhe xhozixhneʼ na gakeʼ tozi lhen nigolha kieʼ» (Génesis 2:24). Jeobá rheenheneʼ benebguioʼ lhen nigolha yeke lezaake lhen ikuake tozi tzalaka nebanke. Na rdeʼ lataj yilaake zelhozi katiʼ notikathesleʼ tzagakeʼ yitolha beneʼ o nigolha. Katiʼ rhaka kan, Dios rkanhe lonaaʼ benebguioʼ o nigolha bibidolaʼ nape, guioeʼ cheʼ yilaakeʼ (Mateo 19:9). a Jeobá be rheyolachhie ka beneʼ wenchhin kieʼ ktzaganake lhen beneʼ zian (1 Timoteo 3:2).
KSEEDIRHA MÁSRHE KI TANÍ
Ni uyorha bi waka gonloʼ cheʼ—zualho towelazalho o notzaganalho—kuenda sualho yatzayolaj lhen gzualho yatzayolaj Jeobá.
4. Gleaj banheza tan zualho towelazalho
Jesús bsákagazeʼ tan gzueʼ towelazeʼ (Mateo 19:11, 12). Le ulaba Mateo 4:23 na le ktzalaj ki taní:
-
Nákaʼ bgonhechhin Jesús tan gzueʼ towelazeʼ kuenda gonhe chhin ki Xhozeʼ lhen gonhe yodarhi yezikalha beneʼ.
Ka bin wenchhin ki Dios wezuakabi yatzayolaj cheʼ rgonkebichhin chhiaʼ tan zuakabi towelazakabi kaʼ bhen Jesús. Le uyo VIDEO na le ktzalaj ki taní:
-
Bi banheza wazeke kueaj bin wenchhin ki Dios zuakabi towelazakabi.
A nesloʼ.
Biblia be rnhe bata waka ktzaganarha. Sanlhe rhee rhoʼo rhala kuezarha nan chi gderha «flor de la juventud», rhenheinhe katiʼ to bin xhkuidiʼ rzelachhibi gapabi sexo, tan rhon na ku gombi pensarhi chhiaʼ (1 Corintios 7:36).
5. Byo chhiadi nó lhen ktzaganalho
Tan guiolho nó lhen ktzaganalho naka ta rhongaze bayochhi gonloʼ kuenda chhiaʼ. Le ulaba Mateo 19:4-6, 9 na le ktzalaj ki taní:
-
Bixhkieʼ beneʼ wenchhin ki Dios rhala gonhe kuenda chhiaʼ katiʼ ziʼ ktzaganeʼ.
Biblia gon lueʼ yodarhi inezelo bi ta chhiaʼ rhala gapa beneʼ o nigolha rheenhelho siʼlho. Ta rhontherhe bayochhi, beguilhaj beneʼ rhekene Jeobá. b Le ulaba 1 Corintios 7:39 lhen 2 Corintios 6:14. Denhaʼ le ktzalaj ki taní:
-
Cheʼ to beneʼ rseedie ki Dios rheenheneʼ ktzaganeʼ, bixhkieʼ rhala uyoeʼ to beneʼ rheanelachhie Dios kase leʼ.
-
Nákaʼ rhekelho suá Jeobá cheʼ to beneʼ ktzaganeʼ lhen to beneʼ be rheanelachhie leʼ.
Cheʼ gzuake chopa beaguixhi be nakakaba lhebi xhaniaʼ to yogaʼ, irhopakatheba sakayaakaba. Lhezekan cheʼ to beneʼ o nigolha wenchhin ki Dios ktzaganeʼ lhen to beneʼ be rhekene Jeobá wapakeʼ tazeedi.
6. Bleʼ matrimonio kaʼ rleʼ Jeobá
Lo yechhi Israel bala beneʼ bsannakeʼ nigolha kieke tan goonkene yizikeʼ nigolha yobla. Le ulaba Malaquías 2:13, 14, 16 na le ktzalaj ki taní:
-
Bixhkieʼ Jeobá rlenheziʼ katiʼ beneʼ notzaganake rhelaake lhen be naka nia ki to ta zua lo Biblia.
Tan tzagake beneʼ o nigolha yobla lhen gsannaʼ lezaakeʼ rzuayechike bindoʼ kieke lhen beneʼ be napeʼ dolaʼ.
Le uyo VIDEO na le ktzalaj ki taní:
-
Cheʼ lueʼ notzaganalho lhen to beneʼ be rhekene Jeobá, bi waka gonloʼ na sualho yatzayolaj lo matrimonio kioʼ.
7. Bzenaga tan rnaba Jeobá ki beneʼ notzaganake
Bala beneʼ notzaganake rhongaze kieke zeedi gzenagake tan rnaba Jeobá. c Sanlhe leʼ rhonlaaye beneʼ rhonke gazelho rzekikene na gzenagake kieʼ. Le uyo VIDEO.
Le ulaba Hebreos 13:4 na le ktzalaj ki taní:
-
A rhekelho tan rnaba Jeobá ki beneʼ notzaganake naka ta wazeke gonke.
Jeobá rbezeʼ beneʼ wenchhin kieʼ gonke guichi katiʼ ktzaganake lhen katiʼ yilaake, lheʼ naka to ta rnabaka beneʼ rnhebheke ki beneʼ doxhenthe lichhileyo. Le ulaba Tito 3:1 na le ktzalaj ki taní:
-
Cheʼ notzaganalho, nákaʼ nesloʼ naka chhiaʼ guichi kioʼ lhen nezi beneʼ rnhebhekeʼ.
BALAKE’ RNABAKE: «A rhonse bayochhi gonrha guichi katiʼ ktzaganarha. A ku gaka kanze».
-
Bi yochhilhoʼ.
TA CHI BYEDIERHA
Tan suarha towelazarha lhen tan ktzaganarha naka to ta zaakaʼ rhona kierha Jeobá. Beneʼ zuake towelazake lhen beneʼ notzaganake wezuake chhiaʼ lhen yatzayolaj cheʼ gonke kanha rnaba Jeobá.
A rhanelho
-
Bi ta chhiaʼ waka gon to bin zuabi towelazabi.
-
Bixhkieʼ Biblia rnhe beneʼ wenchhin ki Dios rhala ktzaganake lhen beneʼ rheanelachhike Jeobá kase lhekeʼ.
-
Bata rnhe Biblia waka yilaa beneʼ notzaganake.
BYEDIE MÁSRHE
Bixhkieʼ rhala ktzaganarha lhen beneʼ rheanelachhie Jeobá.
Byo bi gon lueʼ yodarhi cheʼ nó rheenhelho gledzaloʼ lhezekan cheʼ rheenhelho ktzaganalho.
Gnisie bixhkieʼ to beneʼ noxhenláchhie Jeobá chi bdeʼ kieʼ ta nakarhe chhiaʼ kasla ta bkanheʼ.
Bi rhala gon kuenda to beneʼ wenchhin ki Dios cheʼ ryoeʼ ksanhe o yilaagueʼ lhen beneʼ o nigolha kieʼ.
b Dia bala yechhi ganhaʼ xhozixhnake ryoke nó siʼ bin kieke. Katiʼ rhaka kan, lhekeʼ rhala uyoke cheʼ binxhkuidinhaʼ rheenkene siʼ bin kieke rhekebe Jeobá. Taní rhonrhe bayochhi suake kuenda kasla domiʼ o bilhataʼ.
c Cheʼ lueʼ nó zualhenlo lhen ku dia guichi kielhe zua lo naalho guiolhoʼ a gonle guichi kielhe o cheʼ yilhaalhe.
