Yekova naida agu aboro mangi rogatise nye ni ruruyo kuti gayo zungahe nga ga rogatise. Ho Yekova akodi bambata kumba ni na dee rogo rogatise, ko aya: ‘Si du boro nikaa . . . nihe bani ti ni na nani, ki ka kuti diani, i ki du wa boro sa.’ Kusa Yesu agumba kina ngbatunga gu bangisa fugo re ki ya: “Were gu Mbori akpamia re ka boro kpara nga ha ya.” (Bambata Pai 2:24; Matayo 19:3-6) Sidu, aYekova na Yesu nabi rogatise ni guhe nanyeanye kindi, nga gu nadigo sa kinaho guni akpi ni. (1 AKorindo 7:39) Wa duhe nga rogatise nga nyanyakipa pai, si aidanga mbutise du ni taatapai te. Nirengo, Yekova nasoga gu mbutise adunga mburuhe rogo Ziazia Kekeapai yo ya.​—Maraki 2:15, 16.

 Ga Ziazia Kekeapai bipai nga gine tipa mbutise? Yekova nasoga bäri gbiati wasiwasi kodaba. (Bambata Pai 39:9; 2 Samuere 11:26, 27; Atambuahe 51:4) Ko nabi wasiwasi kodaba ni kere gbegberẽpai, na si nga gu ndupai rengbe ko ka mbugene ti ni tipa mbutise. (I sakipai tipa agu apai wasiwasi kodaba akodaha rogo, Kapita 9, genewaraga 7.) Yekova ima fu siapai fu gu boro gani badiarogatise namangi bäri, singia ni naida ka nye na gu gani badiarogatise mangi bäri watadu ni nambu ni. (Matayo 19:9) Ka ni diberã tipa ka mbu ni, ni amanganga gupai Yekova asogaha te. Ono tie, gu dungurati nga ga aKristano angarasanga aboro tipa mbutise te. Gu kurapai kinaho rengbe ka sa gu badiarogatise re ni nye na gu ni mangi bäri re ka si du nga ni yugu ndikidi saberã. Ni yangaraha tie, agu aboro du na ndupai beyo rogo Ziazia Kekeapai tipa ka mbutise, si naida i mangi gayo diaberã nitiyo na ki mbakadi tiyo tipa gu sangbanaapai si narengbe ka ye na ni.​—AGaratio 6:5.

Mbiko dungu kpakaraapai, kura aKristano aima diaberã ka kparaka watadu ka mbu gayo badiarogatise ka si vura du vurũ nga ni amanganga wasiwasi kodaba te. Ho du pai ni wa ngbatunga gure, Ziazia Kekeapai naya gu ni diberã ka kparaka, ni ‘nye nisani, na ni mbakadipai berewe’ na gani badiarogatise. (1 AKorindo 7:11) Ngbatunga gu Kristano re na ranirii tipa ka manga rogatise na kura boro kia te. (Matayo 5:32) Ani makianga dungu agu akpakarapai kura aboro abihe ni ndupai tipa kparaka.

Zanga ngerafuo aborokporo. Aborokporo ima rengba kaa rungo ka i adunga na agu ahe si aidaha tipa raka ya, mbiko bairakporo ayenga na ni fuyo te, wa vura duhe nga ko rengbe arengba ka ye na ni. Ziazia Kekeapai naya: “Gu ni ka aberã nga pa . . . agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.” (1 Timoteo 5:8) Ka ngbatunga gu kumba re asanga gako berã ya, diako ima rengba ka diaberã ka kparaka ka ri aida ka banda gari ngbarago gbiati gu nga ga awiiri. Si naida agu aKristano nga abaakumba wisigipai wenengai tipa gu Kristano ka ká ka  ngerafuo gani aborokporo re. I ima rengba ka kusa gu Kristano ká ka ngerafuo gani aborokporo kusayo rogo dungurati.

Gbegberẽ mangapai nga ga zuũ. Gu badiarogatise namangapai na zuũ ima rengba ka manga gani badiarogatise gbegberẽ na gani raka kidu ngbapai. Ka si dunga gu badiarogatise nga boro zuũ re nga Kristano, si naida agu abaakumba nga ga dungurati yo wisigi gupai re wenengai singia rengo du watadu rengo ngaha te. I ima rengba ka kusa gu boro kusayo rogo dungurati du na bakere zinga gbiati gu mangaapai nga ga zuũ.​—AGaratio 5:19-21.

Ho du ga boro raka ni rogo toro yo ngbapai. Badiarogatise ima rengbe kaa saha ni mbumbuhe fu gani badiarogatise ni nimangi agu apai nga ga ndikidi irisombori watadu ka sani ni kuo ga Mbori andiko ngba kura agene. Rogo ngbatungapai wa gure, gu ni du gani raka ngbaapai re ima rengba ka diaberã singia ka ‘gia sangba Mbori agia susi ga aboro’ ni kusa ni waraga kparaka.​—Amokedi 5:29.

Rogo gi kpakaraapai ani na sakipai tipaha re, si aidanga boro gumbapai fu gu badiarogatise nga boro wenesa re ni kparaka watadu ni nye te. Wa vura duhe wo, agu aKristano naima nyaka rogo toroyo gbiati abaakumba ima rengba ka fu agu arugute du mburuhe rogo Ziazia Kekeapai, i arengbanga ka ino gu wiri rukutu apai dunduko du dagba kumba na diani te. Kina Yekova sa rengbe ka bihe. Gu Kristano nga diakumba arengbanga kaa fu taarimo fu Mbori watadu kaa bi gu ringbisapai nga ga rogatise na nyanyakipaha ka ri akiiso gu wiri rukutu apai dunduko namanga kporo yo tipa ka kparaka na kumbari te, kina gu bangisapai re a du tipa kumba. Yekova ima ino gu bipai dunduko du tipa kparaka, ka boro vura ida ka okaha aoka vurũ. Nirengo, “apai dunduko du ni kundirihe ni zaza ha bangiri gu ko ani ka mbakada gaani apai fu ko.” (AEbere 4:13) Ka kpakaraapai andu kindi kumbatayo, si aidanga boro bisirapa gu Kristano du na yangada ndupai beni tipa ka diaberã tipa kparaka te. Ti yangada aregbo, “ani amongo ru aru barangba ga Mbori mbata sapangbanga dunduko.”​—ARomo 14:10-12.