Mary na kumbari nga, John, a naraka rogo gu gbata dungu agu aboro ninaaye Philippines yo ka raka rogoho na kini mangisunge, na i na ngbarago ka tungusapai fuyo. Ti regbo Korona, Mary atona wisigo Baibiri na aboro angianga kina aguyo sa du rogo gu gbata ri araka rogoho ya ono rogo kura aba a rogo zegino. Waigu ri amangi gipai re?

Mary aasana agu aboro ri aawirika Baibiri na yo nga, “Ya mo oni iningo pa gu kura boro nakpinyemu ka wirika Baibiri?” Ka singia i aniya ii, ri anisanahe nga, i pepa ri fuyo. Sangbana sana gi taata sanahe re dedede anidu ni wenehe. Tipagine? Bambiko agu aboro nakpinyemu gupai i awirikaha rogo Baibiri yo, dedede ninaaida ka gumba agu apai fu gayo aborokporo watadu fu abakureayo i nawirikihe. Waigu ga Mary anawiriki Baibiri amangipai ho Mary asanahe ni?

Ga Mary nawiriki Baibiri nga Jasmin agumbapa aboro furi biama nga aguyo a naaida ka wirika Baibiri. Boro sa dagbayo yo nga, Kristine, aagbia ngbarago ti gari wirikapai ni bakerehe si ki sa gupai nga ri sana Mary i naawirikapai na ri bara ue rogo poso yo. Ho Mary asana Kristine ni singia ri iningo pa kura boro berewe naida ka wirika Baibiri, ri aya, “Ii, mi nika pepa ro fu anakureami.” Vuru bete aposo yo gbua, Kristine apepa anakureari biama fu Mary nga aguyo naaida ka wirikapai. Kusa, Kristine apepa ri fu kura anakureari, na beteyo dagbayo ki fu kura rimo aboro nga aguyo naima rengba kadu na nyemu ka wirika Baibiri.

Kristine aaida a gari aborokporo Philippines yo wirikipai tipa Baibiri. Sidu, ri afura fu wiiri nga degude, nga Andrea. Ti bambataha, Andrea aberẽ gupai nga, ‘Gu pambori nga ga aDezire Yekova re nga sangisangi pambori, i aidanga kuti Yesu te, na i namangasunge sa na kina Kuru Ndika.’ Ono tingbafuo bangisa wirikapai sa, gu iraira bipai ri adu na ni ago kusayo. Ti regbo gari awirikapai dunduko, ri anaya, “Ka si du nga Baibiri du pehe wo, naida ka ya kina boro rengo du!”

Tifuo bete aregbo, Andrea apepa Mary fu anakureari ue gbiati kura gari badiasunge nga guri natona wirikapai a. Berewe a, Mary aainongo gupai nga deriba Andrea nga iravurari aadega turi adega kuti gayo wirika Baibiri te. Sidu, rogo kura uru sa, Angela asana Andrea ri pepa ri fu Mary na ki sanahe tipa gari wirika Baibiri. Angela aima kpinyemu gupai ri aawirikaha. Vuru diwi yo sa, ri aima zio badungu averesi kuriri yo na kini idi kaa wirikapai bara biama rogo poso sa! Na gu undo nga ga Andrea, Angela atona kaa du pati adunguratise dedede na ri aamangaha dedede rogo vidio.

 Ho Mary aini gupai ni nga kumbaku Kristine, nga Joshua, anidu ti aregbo dunduko mbembedi ti gu regbo i anaawirika Baibiri, Mary asanako singia ko naida i naawirikapai na ko. Joshua aya, “Mi naida gbua ka degature, ono ka mo sananga re na ai sanahe ya. Ka mo sana re, mi naguari kusayo.” Vuru aminiti yo bisue gbua nga ga gu wirikapai re, ko asana badungu asanahe ki susi Kristine na ko aaida kaa ndu kindi kumbatayo na gu sakapai nga ga Baibiri re.

Ga Mary taata sanahe asa gupai nga ri du na badungu aboro ka wirika Baibiri na yo. Dungu yo ri amangi mbakadapai tipa aDezire Yekova wirikipai na yo. Agu aboro dunduko Mary atona wirika Baibiri na yo bangeyo adu nga 28 rogo aringara nibakiakia biama.

Jasmin, nga gu bambata nawiriki Baibiri i nipe pa ri ti tonatonaha, azi bapatiza rogo Zerekpe 2021. Kristine azi bapatiza rogo Merekoko 2022 na ri ima karaga tiri ku Philippines yo tipa kadu na gari aborokporo. Gu kura anawiriki Baibiri ue Kristine apepa yo fu Mary aima zio bapatiza a. Angela azi bapatiza bete adiwi kusa, na ri namangasunge awere ni nazakigene. Kumbaku Kristine, nga Joshua, na wiriyo nga degude, nga Andrea, gbiati kura badungu abawirikipai namanga wene sonakumbatayo.

Ti regbo Yesu na regbo amokedi, badungu aboro agumbapa agu apai i awirikihe tipa Yesu fu gayo aborokporo na abakureayo. (Yo. 1:41, 42a; Amo. 10:24, 27, 48; 16:25-33) Mo sananga agu aboro mo awirikapai na yo gbiati agu aboro du na nyemupai nga, “Ya mo mo inongo pa gu kura boro nakpinyemu ka wirika Baibiri?” Ka mo sana gi taata sanahe re, isoke, mo ima rengba a ka gbia dungu aboro nga aguyo naida ka wirika Baibiri.