1. Rogatise

Aboro na dungu abiapai tipa rogatise na gupai si aidaha tipa kadu na ngbarago rogo rogatise yo.

ROGO GUPAI RE YO: Rogatise nga gupai Mbori amoi mburuhe, ko ima ino gupai si aidaha fu arogotise tipa i du na ngbarago. (Marako 10:6-9) Ho badiarogatise aberãpa gu nyemupai ni nga ga gani badiarogatise i nadu na ngbarago. Gu kumbakudee nakpinyemu diako nika yugoho rogo gu gene yo ko amangapai na ri ngbaha rogo wene gene. Na gu diakumba na irisa kumbari nika yugo ho rogo gu gene yo ri asongoda kumbari na kini irisi ko ngbaha.

AGU ARUGAPAI NGA GA BAIBIRI NAUNDO: Quang na Thi, du naraka Vietnam yo aidi kuti gupai nga i adu nga na ngbarago rogo gayo raka yo te. Quang anaapeka gbegberẽ afugo dedede. Ko aya: “Dedede wo mi anaba gberãrago ti Thi.” Thi aida mbutise. Ri aya: “Mi abihe nga mi arengbenga ka kido kuti kumbami watadu ka irisa ko te.”

Ni yangaraha, Quang na Thi awiriki gupai Baibiri ayugoho na ki mangipai kuti AEfeso 5:33 rogo gayo ramukporo yo. Quang aya: “Gi veresi re aundo re tipa mi du na wene sino na ki sa Thi ri nabi tiri nga i nakpinyemu ri akpi kini ngerefuo gari azingo nga ga borose, na pa du ri wenengai ti kpotori na berã ri yo. Ho mi amangipai ni wa gure, ri atona ka kpinyemu re na kini irisi re.” Na Thi aya: “A wa mi aandu kumbatayo ka mangapai kuti AEfeso 5:33 kini irisi kumbami, kinawo mi abi tire nga ko na kpinyume re mi kidu ni bandabanda re na mi agbia zereda.”

 2. Wai ka Mangapai na Kura Aboro

Dedede aboro namanga fu akurayo gbegberẽ mbiko pa kpotoyo,wai i angera, gu ba i aye rogoho, gayo pambori, watadu gupai nabi gayo pa kodaba.

ROGO GUPAI RE YO: Baibiri ayugongo gupai furani nga ani sogo gu kura aboro du ngbatunga yo kia watadu gu kura aboro ringara watadu agu aboro nga aboro baagburu te. Ono kuba gure, si na ngarasa rani ani du na irisa koyo du aboro ni du, zanga bipa rangi kpotoyo, gayo ringara, watadu i nga airakumuko watadu airarungo. (Amokedi 10:34) Ka si vura du nga ani aidanga kuti gupai gu kura aboro naida kutini te, ani ima rengba ka mangapai na yo rogo weneringise yo na irisa.​—Matayo 7:12.

AGU ARUGAPAI NGA GA BAIBIRI NAUNDO: I ayugu gupai fu Daniel nga ko ni bi agu aboro naaye Asia yo nga avura gako ringara. Ko aasoga agu aboro naye Asia yo nikerehe na dedede wo ko anaape gbegberẽ afugo fuyo gbaiga dagba aboro. Daniel aya: “Mi abihe nga gure nga mi nasongoda gi ringara. Mi aabingo ho nga gu gene mi aberã na kini fura ngbaha adu ni irairaha te.”

Daniel aye ka wirika gupai Baibiri ayugoho. Daniel aya: “Si aida mi aria wai mi aberã. Si aida mi ni bi aboro kina wai Mbori abi yo—nga ani kina sa bangiriko ka ani vura ka ye kina wari vurũ.” Daniel asakipai tipa wai ko abi aboro awere ho ko agbia yo ni. Ko aya: “Mi naberãnga pa wari i aye ni te. Mi nakpinyemu aboro dunduko awere na mi na mbembedi abakure rogo papara zegino dunduko.”

 3. Marã

Dungu aboro naida ka da ni airakumuko tipa kadu na ngbarago na tipa gayo raka du kumbatayo ni wenehe.

ROGO GUPAI RE YO: Ani naida na marã, ono ka si sanga rani ani du na ngbarago awere watadu raka rani kidu kumbatayo wenengai te. (Asanza 18:11; 23:4, 5) Kuba gure, tipa kadu na ndikidi ngbarago pa raka rani kidu ni wenehe kumbatayo naru rii pa manga ani pai kuti gu tatamana naye be Mbori a wa duhe rogo Baibiri yo.​—1 Timoteo 6:17-19.

AGU ARUGAPAI NGA GA BAIBIRI NAUNDO: Cardo, nga kumba Indonesia yo amoiberãko tipa gbia kumuko. Ko aya “Mi adu na agu ahe bere aboro aidaha. Mi adu na rengba ka ndu kurogo kura aringara, na ka ngbe agu ahe du na bakere genoho, atarambiri, na akporo.” Ono gako marã re aimanga ku beko te. Ko aya, “Boro anangi re na ki di gu marã re dunduko bere nga gu mi amangi sunge nyanyaki tipa ka gbiaha tipa dungu agarã wakina ikpiro gumba. Mi amangisunge nyanyaki tipa dungu agarã tipa ka gbia kumuko, ono tie kina rago na gberẽ tire bambiko he adu nga bere te, na mi abi tire nga sunge tire te.”

Cardo atona mangapai kuti agu arugute nga ga Baibiri du tipa marã. Ko amaa nga berãko awere tipa ka gbia bakere marã te, ono kuba gure ko na raka taata raka. Ko aya: “Mi nabi tire awere nga mi na ndikidi kumuko bere, bambiko mi na wene pagume dagbare na Mbori. Mi na ra awere wenengai yuru, na mi na ndikidi ngbarago.”

 4. Kodaba

Aboro na dungu abi apai tipa gini ngbatunga kodaba ngba.

ROGO GUPAI RE YO: Baibiri ima fu ngbanda tipa wai si aida ani yugu gaani nyemupai nga ga kodaba. Gu fugo nga “airameteka” watadu wasi wasi kodaba nakoda bäri, sunge banambara, gu kodaba du dagba agu aboro ata manganga rogatise ya, gu kodaba du dagba kumba na kumba watadu dee na dee na kodaba na anya. (1 AKorindo 6:9, 10) Kodaba nga gamahe be Yekova nga gu ko afuhe fu gu kumba na dee nga aguyo mangi rogatise.​—Asanza 5:18, 19.

AGU ARUGAPAI NGA GA BAIBIRI NAUNDO: Dee du Australia yo du rimori nga Kylie aya: “Ho mi adu ni ni nakuparanga mi aaberã gupai nga ka mi mangi kodaba mi nika bi tire nga i ima kpinyemu re na mi kidu ni bandabanda re. Ono gupai du kia ti gure namangi. Mi abi tire nga mi ni bandabanda re te na mi adu na bakere gberãrago.”

Kusa, Kylie awiriki gupai Baibiri ayugoho tipa kodaba na ki mangipai kutini. Ri aya: “Mi ima bi gupai nga ga Mbori arugute tipa ka banda rani be imisiri na fuda. Mi nabi tire awere ni bandabanda re na aboro na kpinyemu re akpi bambiko mangapai wai Yekova aida ani mangihe. Mangapai kuti ga Mbori arugute ima batasa re be dungu aimisiri!”