1. Oni funga kpiapai ka yugo ndu gupai duhe ti ni ni nyanyakipa pai tipa ka ino gu regbo na gupai namanga pati rani. (Oni bi gu sura du ti tonatonaha.)

HO Basungu-rii-kiti nga ga bakere dunguratise ayamba rani ni tipa ani ye ka susungo rii gaani abasungo, ani nainoho nga regbo gere tipa ani sungu rii gaani aba tipa ka gia gu manzigo du tipa tona gaani bakere dunguratise. Si nga regbo tipa ka degaturani wenengai kuti gu bawene manzigo nga ga riigbu na gu nyakipaha anyaka gbe nga, ka mbakada berãrani yo na ngbaduraniyo tipa agu agumbapai nika manga. Ono ginipai rengbe ka manga ka si du nga gu kura aboro amaanga berãyo te, i nata ata na kini fura gbua na abakureayo zanga ino gupai nga bakere dunguratise ima tona? Si yuguhe ayugo nzunzu nga i angeranga angera kindi tipa ka ino gu regbo na gupai namanga pati yo te nga basungu-rii-kiti ima da rii tambara yo, manzigo napaa, na aboro ima susungo. Gi kpiapai re ima rengba ka undo rani ani du na tambuahe tipa gu kura bakerepai, nga gu naida ani degeturani wenengai tipa agu apai nika manga barambeda kumbatayo. Gini bakerepai du ngaha?

2. Tipagine Yesu aya ti ni fu gako abawiriki i ni “ngére” angera kindi?

 ² Ho Yesu aafura ni tipa “pa digida rago,” ko azungodi gako abawiriki nga: “Oni bánda tironi abanda, oni ngére angera ki nikpari; bambiko oni aina nga ragoho te.” Fuo gure, Yesu aruguyo dedede nga: ‘Oni ngére angera.’ (Mat. 24:3; oni gedi Marako 13:32-37.) Gu pangbanga nga ga Matayo nafura tipa kina gu bangisapai re, si nayugo gupai nga Yesu aza apefuoko tipa i naangera angera kindi nga: ‘Oni ngére tie, bambiko oni aina nga ni gu uru gaoni Gbia ka ye te. Oni mbákadi tironi a tie; bambiko Wiri boro naye ti gu saa oni aberã nga pa ha ya.’ Ko aya berewe wẽ: ‘Oni ngere tie, bambiko oni aina nga uru he na gu saa a te.’​—Mt. 24:42-44; 25:13.

3. Tipagine si aida ani moiberã rani ti ni fuo ga Yesu zahe?

³ Wangia ani aDezire Yekova, ani nadia ga Yesu zahe na nyanyakipaha. Ani ima inoho nga ani naraka rogo ‘digida rago’ na regbo nye ni toonihe tipa “bakere gberãngbi” tona! (Dan. 12:4; Mt. 24:21) Ani nabi kere avura, wai wasiwasi mangaapai amaapai, kuoandiko, gu vunduvunduapai nga ga apambori, angbongi, ririakaza, gbiati abazigizo nga gu namanga rogo zegino dunduko. Ani ima inoho nga bakere sunge tungusapai namanga be ga Yekova aboro rogo arago dunduko. (Mt. 24:7, 11, 12, 14; Rk. 21:11) Ani namaabangirani tipa gupai paye Gbia nika mangaha furani na tipa ka digiso ga Mbori ringbisapai.​—Mk.13:26, 27.

4. (a) Tipagine du rengbe ani ti ni ka ida kuti gupai nga Yesu ima ino gu regbo Aramegido nika tona ti ni awere? (b) Wa vura duhe nga ani inongo gu regbo bakere gberãngbi nika tona ti ni te, ginipai rengbe ani kadu na kido tipaha?

⁴ Ani ima inoho nga apapara bakere adunguratise dunduko du na gu regbo si aida si tona ti ni. Ono tie, ka ani vura manga kina gine, ani arengbanga ka ino gu ndikidi garã na gu saa bakere gberãngbi nika tona ti ni te. Ho Yesu adu ni auru kpotosende, ko aya: “Ono boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Mt. 24:36) Yekova ima fu ome fu Yesu tipa ko ye ka sovura kuti gi ga Satana zegino re. (Yugo. 19:11-16) Rogo gi gene re, si daada ani dakuti gu digisopai nga Yesu ima ino gu regbo awere Aramegido nika manga ti ni. Ono tie, ani ainongo ho te. Si ni nyanyakipa pai tie nga ani sungu kaa ngera angera kindi daho bakere gberãngbi ka tona ni. Wa vura duhe wo, pa gu regbo re aagonga bangiri Yekova te. Ko ima diaberã nzunzu tipa gu regbo digido gi zegino re nika ye ti ni. Ko nageda gu regbo ageda nye koyo tipa bakere gberãngbi tona, na pa tonaha “aíma nga te.” (Oni gedi Abakuka 2:1-3.) Wai du rengbe ani kadu na kido kuti gipai re?

5. Oni funga gu kpiapai nayugo gupai nga ga Yekova sangbaanebi nadigisotihe dedede kina bangiri regbo yo.

⁵ Dedede, ga Yekova sangbaanebi nadigisotihe kina boro bangiri regbo yo! Ani bingo gupai naadu tipa gu regbo ko akusi aYisaraere Ezipeta yo. Moize afura tipa gu garã nangia Nisana 14, 1513 Mbata fu Batikayo Kristo nga: “Si ki ta du wa gere, ho garã adigi ni 430, ti kina boro gu uru re, ga Yekova arimbasa aborovura ki kuru akura kpakaya rogo ringara Ezipeta.” (Gate 12:40-42) Agu ‘agarã 430’ re atona ho ga Yekova mozunga na Abarayama atona ka mangasunge ni rogo gu garã nangia 1943 Mbata fu Batikayo Kristo. (Gara. 3:17, 18) Kusa, Yekova aya fu Abarayama wẽ: “Mo íni he ni rengo ya ngbatungaro adú ni kungba aboro rogo gu ringara adu nga ni gayo ya, i ki du ni akanga fu aboro gu ringara re, i ki rungosi yo agarã ki du 400.” (Bam. P. 15:13; Amo. 7:6) Agu ‘agarã 400’ rungosi re atona rogo 1913 Mbata fu Batikayo Kristo ho Yisamaere asangipai  ni kuti Yisaka fuo i mbuko ti mai, na si adigi ti gu regbo aYisaraere akuru Ezipeta yo rogo gu garã nangia 1513 Mbata fu Batikayo Kristo. (Bam. P. 21:8-10; Gara. 4:22-29) Nirengo, mbata fu kama agarã biama kumbatayo, Yekova aima sia gu regbo ko nika kusa gako aboro ti ni!

6. Tipagine rengbe ani ti ni kadu na gu kido nga Yekova abatasa gako aboro abatasa?

⁶ Yosua nga gu boro naadu dagba agu aboro i kusiyo Ezipeta yo, ko atingidi aYisaraere dunduko nga: “Oni dunduko ini he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.” (Yos. 23:2, 14) Ani rengbe kadu na gu kido nga gu ga Yekova kidohe du tipa ka batasa rani ti regbo bakere gberãngbi, si amanga amanga. Ono tie, ka ani aida ka bata ti regbo gbarasa gi zegino re, si naida ani ningere angera kindi.

7, 8. (a) Sunge ababandarago angia gine mbata kusayo, na ginipai si ayugoho furani? (b) Oni funga gu kpiapai rengbe ka manga ho ababandarago ara ara ni pati sunge?

⁷ Ani ima rengba ka wirikapai tipa pa nyaka ngera angera kindi ti agu apai nanaamanga bakuru kusayo. Mbata kusayo, kikindigi agbata wa Yerusarema adu na ndugu pati ni kirikiri. Gu ndugu re anaafu bandahe be agu aboro na ni rengbe kati na ni ni vura na si anaasa ababandarago i rengbe ka ngera pati gbata kirikiri tuturũ. Uru na yuru, ababandarago anaasungo kina rii ndugu yo na ngbadimo yo. I du naanirengbe ka pepa gu kerepai naaye sa agu aboro du vuru gu gbata re. (Yes. 62:6) Si anidu nga ka ababandarago amaanga berãyo wenengai ya, i nazanga ungayo azanga.​—Yeze. 33:6.

⁸ Ga aYudo bakeke kuru apangbanga nangia Josephus aya rogo gu garã nangia 70 Fuo Batikayo Kristo, ga aRomo abanzengere adi gu gbanga bambu nangia Tower of Antonia, ki zi papara gu ngapa nangia ga Yerusarema mbiko agu ababandarago naadu ngbadimo ndugu yo ati ni rame! ARomo aoro nibasa ku yekaru yo ki zoho, na surungbaha ki kusi bakere gberãngbi nga gu Yerusarema na aYudo aagbianga tiyo na ni mbata ya.

9. Ginipai dungu aboro ainongo pai tipaha areme ya?

⁹ Dungu aringara areme du na “ababandarago” behe nata ka bi gayo ngbanda aringara, watadu gu kere akamera nadia sura tuturũ. Agi aboro na agi akamera re nangera tipa agu aboro rengbe ka rimo gayo ringara gbiati agu avurayo naida ka manga fu gayo aboro-ringara gbegberẽ. Ono tie, “ababandarago” rengbe ka bi kina gu kerepai naye be gu zogarago nga ga aboro watadu be aboro. Ono i ainongo pai tipa ga Mbori Kindo nga ga ngbangbaturũ na agu apai si amangaha vurube Kristo gbiati gupai si nika mangaha ti regbo sapangbanga aboro kumbatayo te. (Yes. 9:6, 7; 56:10; Dan. 2:44) Ono ka ani angera angera rogo toro yo, ani nika du ni mbakadimbakadi rani ho gu uru sapangbanga re nika da ni.​—Tam. 130:6.

10, 11. (a) Ginipai si aida ani du na rubangirise tipaha, na tipagine? (b) Ginihe nasa ro mo idihe nga Bakitingbanga aidanga aboro degetuyo kuti gu sangbaanebi nga ga Ziazia Kekeapai te?

¹⁰ Oni berẽnga kina pa gu babandarago du ni unga ni pati gani sunge yuru sasasa. Ni ki da na mbugo na ki ti ni rame rago nimbedi ka giro. Wakina gure, wa ani ambeda na gi digido zegino re, si nasaha furani ni mbumbupai ani naangera angera kindi. Nairiwo wai ka si gberẽ ka si du nga ani angeranga angera kindi te! Ani wisigingo gu gbegberẽ  apai biata rengbe ka sarani ani ti ni rame ka ani adu nga na rubangirise ya na ki mbu kaa ngera angera kindi.

¹¹ Bakitingbanga nazomia aboro i du sakparakpa kuti agu apai nga ga toro. Ngbutuko mbata fu Yesu kpi, ko aza gako abawiriki bara biata tipa “gbia gi zegino re.” (Yo. 12:31; 14:30; 16:11) Yesu aima ino gupai nga Bakitingbanga nika kiso berã aboro akiso ka i iningo pai tipa ga Mbori sangbaanebi du tipa gbarasa gi zegino re kumbatayo ya. (Zef. 1:14) Satana nakiso berã aboro vurube bariwara ngbii zire pambori. Ginipai mo abihe ho mo afura ni na kura aboro? Ya mo mo abingo ho nga Bakitingbanga ima ‘kiso gayo aberã’ tipa digido gi zegino re na ka i iningo gupai nga Kristo nazogarago awere rogo ga Mbori Kindo ya? (2 Kor. 4:3-6) Bara wai mo nagi gupai ngba aboro i niya, “Nyemu gupai re ti re te”? Dedede, i aidanga ka gia gupai ani agumbaha fuyo tipa wari gi zegino re andu kuhoni te.

12. Tipagine si aidanga ani mbu Bakitingbanga ti ni ko nangi rani ya?

¹² Ka oni mbunga gu sakparakpa du ti kura aboro si fudi roni watadu ka mbuhe si saroni ka oni naangeranga angera kindi ya. Oni ima ino apai wenengai. Pauro ake waraga fu akurako aidipase nga: “Oni ini tigaoni nzunzu ya rago Gbia naye wa iradĩ naye yuru,” na ko agbia kurapai kutini nga, “[si] naye wa iradĩ naye yuru.” (Oni gedi 1 ATesaroniko 5:1-6.) Yesu aza rani nga: “Oni mbákadi tironi a wo; bambiko Wiri boro naye ti gu saa oni aberã nga pa ha ya.” (Rk. 12:39, 40) Barambeda, Satana nika nanga bakere rimbasa aboro i idi kuti gupai nga “zereda, ngba barani angba.” Ko nika nanga yo i berẽ gupai nga apai naabaha dunduko nandu andu wenengai auru kpotosende. Ginipai du tipa rani tigaani? Si aidanga gu uru sapangbanga re ‘ye [furani] wa iradĩ’ te ka si du nga ‘ani nakparia rago ki nirugu tirani’ na ni. Si du nga ndu gupai si aida ani gedi Fugo Mbori ti ni na aˈuru dunduko kini berẽkurii gupai Yekova agumbaha furani.

13. Wai du gu toro nga ga zegino amaapai kurii aboro, na wai du rengbe ani ka ne gi kere maapai re?

¹³ Gu toro nga ga zegino nasa aboro i ra rogo toro yo. Dungu aboro nadia bakere regbo kina kuti agu apai nabipa gayo raka zanga i “inipa gu gayó azingo nga ga toro.” (Mt. 5:3, New World Translation of the Holy  Scriptures.) I nadia gayo bakere regbo na ome kina ku gene agu ahe yo nga ga gi zegino re nga gu nasonosa “gu nyemuhe nga ga borose, na gu nyemuhe nga ga bangirise.” (1 Yo. 2:16) Berewe a, aba kusa ambaro nasa aboro i ‘kpínyemu sangba borose,’ na dungu aboro nazio ti gi gbina re agarã na agarã. (2 Tim. 3:4) Si du nga ndu gupai Pauro aya ti ni fu aKristano wẽ ka i “igi nga [watadu ka songa gima] he fu borose ka zeresa gaha nyemuhe ya.”​—Rom. 13:11-14.

14. Gini zahe ani agbiaha rogo Ruka 21:34, 35?

¹⁴ Kuba gu toro nga ga zegino, ani nadia gu maapai kurii nga ga ga Mbori ziazia toro rogo gaani raka yo nga gu Yekova nafuhe si undo rani ani rugutirani wenengai na agu apai du kumbatayo furani. ^[1] (1 Kor. 2:12) Ono wa vura duhe wo, ani ima inoho nga si akpakaranga tipa boro tona ka yukuro rogo toro yo te, ka ani mbugene fu agu apai ani amangaha rogo raka yo si diba agu apai nga ga toro, si ima rengba ka sarani ani tona ka yukuro. (Oni gedi Ruka 21:34, 35.) Kura aboro ima rengba ka sawia rani tipa ngera ani angera kindi, ono anga gere nga ndupai ani mbu berãpa gu uru ga Mbori Kindo ka ye ti ni te. (2 Pet. 3:3-7) Kuba gure, si naida ani dunguratirani na awirinarani aKristano dedede rogo gaani adungurati, yo du du ga Mbori toro ni.

15. Ginipai namangi Petero, Yakoba, na Yoane, na wai du rengbe gupai re ka manga rani a?

¹⁵ Gaani zangarengba rengbe ka gbarasapa gaani diaberã kaa ngera angera kindi. Yesu aima ino gu sino du ti kpakpa aboro nga ka mbutiyo fu gayo arungbura nga ga borose. Oni bingo gupai namangi rogo gu yuru naadu mbata fu i imiko. Tipa Yesu kakuti padu ko ni ruruko, ko akpari fu Bako tipa ko fu ome fuko. Yesu asana Petero, Yakoba, na Yoane nga i “nye erẽ ka angera” baraho ko akpara ni tigako. Ono tie, i ainongo pa nyaka gupai naandu ka manga te. Kuba gupai nga i ningere tipa Bairayo, i afutiyo fu gu rungbura nga ga borose na ki ti ni rame. Wa si avura du nga Yesu aima mbu a tigako, ko adu ni ungako na kini kpari nyanyaki fu Bako. Gere nga gupai si aaida abakureako ni mangihe a.​—Mk. 14:32-41.

16. Ringbisihe kuti Ruka 21:36, wai du Yesu arugu rani tipa ani ‘naangera dedede’?

¹⁶ Tipa kaa ‘ngera dedede’ rogo toro yo, si nakoda dungu apai angianga kina du na wene berãpai sa ya. Bete aˈuru mbata fu gupai namangi ati Getesemane yo re, Yesu aya fu gu bangisa abawiriki re i kpari fu Yekova. (Oni gedi Ruka 21:36.) Tipa ani naangera angera kindi rogo toro yo, ani duwa ka ani kpatagara kuti kparakpee a.​—1 Pet. 4:7.

17. Wai du rengbe ani kadu na kido nga ani ima mbakadatirani tipa gupai du kumbatayo?

¹⁷ Wa duhe nga Yesu aya digido zegino nika da ‘ti gu saa [ani] aberã nga pa ha ya,’ gere nga gu regbo si aida ani yukuro rogo toro yo te, nga gu regbo si aida ani merefuo agu ahe Satana na gi gako zegino re afuhe te, na ka merafuo agu ahe bororani akpinyemuhe a te. (Mt. 24:44) Vuru Ziazia Kekeapai yo, Mbori na Kristo nape gupai furani i nambakadihe tipa rani kumbatayo barambeda na wai rengbe ani kaa ngera angera kindi. Si naida ani moiberã rani fuo gaani azingo nga ga toro, gaani pagume na Yekova, na kini peresipa agu apai nga ga Kindo kumbatayo. Si naida ani moiberã rani fuo wai gu sangbaanebi nga ga Ziazia Kekeapai adigisotihe na ki mbakaditirani tipa gupai du kumbatayo. (Yugo. 22:20) Gaani raka awere ngbapai yo!