HO GBERÃNGO AMANGA NI, YA MO MO NAABAKA BANGIRO NGA, ‘MBORI ADU WARI HO GI GBERÃNGO RE AAMANGA NI?’ WATADU ROGO GAMO RAKA YO, YA MO PAI HO NAMANGI NGA GU NASARO MO BERẼ GUPAI NGA MBORI ANGERANGA FUORO TE?

Isoke, si rengbe ka du nga mo naberã wakina Sheila, naraka Amerika yo. I asonosi ri rogo gu ngbadimokporo du aboro rogoho na nyemu Mbori, ri aya: “Tona mbure tooni, mi aima du na nyemu Mbori tire mbiko ko nga Bakusirani. Wa si avura duwo, mi aabingo tire nga mi mbembedi na ko te. Mi aberẽhe nga ko nabi re abi, ono tuturũ. Mi aabingoho nga Mbori nasoga re asoga te, na mi aaidanga kuti gupai a nga ko nakpinyemure akpi te.” Tipagine Sheila adu ti ni na kapa singia Mbori nakpinyemu ri akpi? Ri aya: “Gimi aborokporo agbiatiyo na gberãngo tingbafuo kuraha, na si aangera wa Mbori aaundongo rani kandara tooni te.”

Wakina Sheila, mo ima rengba ka ida kuti gupai nga gu Mbori Duna Tanduapai Dũ kina ti ni. Ono tie, mo ima rengba ka bakabangiro singia ko naberã paro aberã nzunzu. Gu ruru kumba nangia Eyobo, nga guko naadu na idapase kuti gu ome gbiati gu tatamana du Bakusiahe na ni aima du na kina gu bangisa kapa re. (Eyobo 2:3; 9:4) Fuo Eyobo gbiatiko na agberãngo tifuo kuraha zanga ko gbia undo, ko asana Mbori nga: “Tipagine mo naoka kpakpuro ti ni, ki gedi re wa vuraro?”​—Eyobo 13:24.

Ginipai Ziazia Kekeapai agumbaha? Ya mo si naida ani bira Mbori ho agberãngo amanga ni? Ya mo pai ho nayugo ho nga Mbori nangerafuo aboro dunduko na kini ngerefuo rani ni basasa? Ya mo boro ho dagbarani rengbe ka ino singia Mbori nabi rani, ko ima rugatiko na ani, ko na nunga rani tiko, watadu ko naundo rani na gaani akpakarapai?

Rogo gu kekeapai ngbefuo gere, ani nika makia gupai kusikusiahe ayugoho furani tipa wai Mbori angerafuo rani. (ARomo 1:20) Fuoho, ani nika wisigo gupai Baibiri ayugoho tipa wai Mbori aberãpa rani. Wa mo nika ye ka ‘ino ko’ vurube kusikusiahe gbiati Fugoko, mo nika du na gu kido nga “ko naberã” paro aberã.​—1 Yoane 2:3; 1 Petero 5:7.