Gbegberẽ Apai Dunduko Nika Digo!

MBORI aima fu furako furani nga Ziazia Kekeapai, nga gu nayugo ndu gupai furani aboro amanga gbegberẽ apai ti ni. Na ko aima fu ranirii furani na gu sino ku rogoraniyo nga ga zatise ti pai; si nasaha furani taata ka ani sianga ka manga gbegberẽpai ya. (Pa Fu Rugute ni Ue he 30:15, 16, 19) Sidu tie, si naida ani inipa gu gbegberẽ apai ka du rogoraniyo, ani ki diberã ka manga gupai du niruruhe. Pa zanga ani  manga gbegberẽ apai nika ye na ngbarago furani na fu agu aboro a du pati rani.—Atambuahe 1:1.

Ka ani vura ka asada tirani kina wai vurũ ka ne manga gbegberẽpai, zegino nahi kina kumbatayo be gu gbegberẽ apai aboro amangaha. Ziazia Kekeapai nayaa: “Mo ini gere a, ya rogo kusa rago gbegberẽ rago aye.” Tipa ka yugo gupai nasa “kusa rago” si du ‘nigbegberẽhe,’ si nape gupai nga: “Aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, i akpí nyemu sangba borose susi nyemu Mbori; ki nika kuti kpia sinombori, ono i ati kangu tandu he. Oni kpára tironi ti agi yo re a.”—2 Timoteo 3:1-5.

Gine nga gu “kusa rago” gumbayo paha rogo gu sangbanebi du kuari re? Badungu aboro aima rugatiyo na gupai nga “kusa rago” nga gu regbo du mbembedii kuti digidopai. Digido gine du? Oni bingo agu akidohe du rogo Fugo Mbori yo.

I nika dia gbegberẽ aboro dunduko kusayo.

“Fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te. Ono bayee aboro adía kumbo ringara, ki du na ngbarago tipa gu wenepia du kpaima.” ​—ATAMBUAHE 37:10, 11.

“Yekova nabanda agu yo dunduko nakpi nyemu ko; ono gbegberẽ aboro ko agbárasa yo dunduko.”​—ATAMBUAHE 145:20.

I arungosingo aboro berewe te.

“Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Ko natumo ungayo be bau pai na zuu.”​—ATAMBUAHE 72:12, 14.

“I batasi ũzegino tigaha a be du ni ga zirã kanga sa kura gu taarimo nga ga awiri Mbori.”​—AROMO 8:21.

Zingo ahe amanganga aboro berewe te.

“Aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te.”​—MIKA 4:4.

“I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te; bambiko wa gu rame nga ga ngua wo rame gimi aboro nikadu, gimi siasia aboro ará zezeredi tipa gbanga rago mbiko gu mangapai nga ga beyo.” ​—YESAYA 65:21, 22.

Rurupai amaapai.

“Mbori akáraga nga pa gako siasia aboro nga agu yo nakpara fu ko na uru na yuru, te? . . . Ya mi fu roni, ko akáraga payo ni ngarã.” ​—RUKA 18:7, 8.

“Yekova nakpi nyemu ruru sarangbanga; ko ambú nga pa gako ziazia aboro te. I abánda ruru aboro nye anye kindi.”​—ATAMBUAHE 37:28.

Rurupai adia ba irairapai.

‘Araki rogo zegino awirika pa rurupai.’ ​—YESAYA 26:9.

“Mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.”​—2 PETERO 3:13.

Aboro Nasa Sinoyo Awere

Zanga kapa, ani dunduko duadu na ngbarago mbiko ngbatunga agi akidohe re. Ono wai rengbe ani ka ino ya agi akidohe re nika manga amanga? Ani gu duadu na  gopai berani awere nga ga Mbori akidohe nika manga amanga. Gine nga gi gopai re? Gu gopai re nga, amirioni aboro rogo zegino areme nga aDezire Yekova nagbia ngbarago mbiko i ima mbu gbangbati, wasiwasi mangaapai, watadu gu mangaapai nga ga zuũ na ki wiriki kadu niʹairarengo, aboro zereda, na ni aboro weneringise. Areme, aDezire Yekova bangeyo naima susa amirioni saba rogo zegino dunduko du nga awirina sa, si ki vura du nga rangi kpotoyo nibakiakia, agu apai du tipa yó si nibakiakia, gayó aringara nibakiakia, na agu azogarago du yó kutiibehe nibakiakia nga agu apai nasa asogote, zuũ, na uka kure si naamanga rogo zegino. * Ngbatunga gu ariapai namanga areme re nasa gupai nga ani idi kuti ga Mbori akidohe nga, si amanga amanga nirengo.

Gine du nzunzu nasa aboro i naasa asinoyo? Karagapai sa gi sanahe re du rogo gu sangbanebi Yesaya akehe. Ko ayaa:

“Waru asunga na wiri kandoro, mama api sande pati wiri meme, wiri bagara adu wa sa na wiri bahu na nzenze wiri nya a, kina wiri gude angbe fu ra ku mbata yo. . . . Bahu arí kazimorũ wa babagara. Gude ngbamai angi ti ngba yaro wo, gude mbumai ki moi beni ti ngba yaro kere wo. I aímisa nga aboro watadu gbarasa yo ri gi kparakpara ziazia gangara wa sa te; bambiko kpotosende ahí be ina pa Yekova wa aime nahisa gango baime.”—Yesaya 11:6-9.

Ya mo gi sangbanebi re gumba kina pa gu regbo sa anyaa nika sunga wa sa na aboro? Oó, si nagumba badungu apai susi gure. Digido gu kekepai re nayugo gupai nasa sino aboro. Si nayaa: “Kpotosende ahí be ina pa Yekova.” Ya mo inapa  Yekova rengbe ka sa sino anyaa? Wagusa te. Ono si rengbe ka sa kina sino aboro na si nasaha asa wa du rago re. Gi sangbanebi re afura tipa agu aboro nikadu na asino tiyo wa ga anyaa i ki mbuhe ki sonosi agu sino duwa ga Kristo, mbiko wirika yó agu apai Ziazia Kekeapai ayugoho na kini mangihe.

Oni bingo kpiapai du tipa Pedro. * Ko aya ko aasovura tipa rurupai ho ko akodi tiko ni na gu riigbu nga ga abamoi. Fuo yugo yó sunge abamoi fuko, i kedi ko ko ndu ka baambu ba aborisi. Ho ko aambakada tiko ni ka ndu, i aziko. I aba ko ku bambukiso yo tipa adiwi 18, ko kini ndu kindi kumbatayo na kina gu sunge i aziko tipaha. Ti kina gu regbo re, diako atona wirika Ziazia Kekeapai na aDezire Yekova. Ho i akusi ko ni, ko atona ka wirika Ziazia Kekeapai a, na agu apai ko awirikihe tipa Yekova Mbori asako ko mangi bakere ariapai berãko yo nibipa raka. Ko nayaa: “Mi natambua Yekova mbiko mi aaimongo boro kandara sa ti agu agarã dũ mi adihe kuti sunge abamoi te. Mi namangasunge awere na gu basape nga ga ga Mbori toro, nga Ziazia Kekeapai, ka gumba gu pangbanga fu aboro nga ga ndikidi zereda na rurupai, nga gu wene pangbanga nga ga ga Mbori Kindo.” Ko aima ndu a kurogo gu ba aborisi ko aidi ka baambu he re tipa ka tungusapa zereda  na gu zegino nikaa dunga na zuũ rogoho ya.

Gu ome du Fugo Mbori nani kurii aboro nasa gupai nga ani duna idapase nga ga Mbori kidohe tipa digiso gbegberẽ apai dũ amanga amanga. Aboro amanganga gbegberẽ apai berewe te, ono i asa asinoyo asa kidu niwene yó. Fuo regbo ngbutuko, Yekova nika dia baenge gbegberẽ apai dũ kusayo nga Satana Bakitingbanga du kugii gu gbegberẽ apai dunduko namanga rogo zegino. Ziazia Kekeapai nayaa: “Zegino dunduko du ni zogozogo ho be gbegberẽ ko.” (1 Yoane 5:19) I nika diako kusayo bambeda. I nika diako kusayo na agu aboro aidanga ka mbu gayó gbegberẽ mangaapai ya. Nairiwo gu maku ngaha ka raka ti ngbatunga gu regbo re!

Ginipai rengbe boro ka mangaha tipa ka raka gu raka re? Oni tingidi gupai nga “ina pa Yekova” du nasa sino aboro areme na si a du nika manga ariapai rogo zegino naabaha bambeda kumbatayo. Pa gbia oni gu ndikidi inahe nga ga Ziazia Kekeapai na ki mangipai a wa Pedro amangihe nika sa gupai nga oni du na maabangirise ka raka rogo gu zegino “ruru apai nikanye rogo ho.” (2 Petero 3:13) Ani nazungodi roni oni mangisunge na gu momu du awere ka gbia gu inahe nga ga Mbori na ga Yesu Kristo, mbiko si rengbe ka sa gupai nga oni gbia nyenye unga.—Yoane 17:3.

[Gu rukutu kekeapai du bandu kpewaraga yo]

[Gu kpiahe du ti kpewaraga 9]

Oni du na maabangirise ka raka rogo gu zegino “ruru apai nikanye rogo ho.”

​—2 PETERO 3:​13