Gine Nasa Aboro I Naamanga Gbegberẽ Apai?

PAI gudu ho sa nga gu kina bete aboro narengbe ka tikango nani nga: Ani dunduko nga kpakpa aboro namanga ingaapai amanga watadu irairaapai nga gu ani aye ka biratirani ti ni kusa. Wa vura duhe wo, ya mo si du nga ndu gupai nasa aboro i naamanga bakere gbegberẽ apai watadu agu arukutihe nga gu ani abihe na kini gi paha ti aregbo dũ?

Wa vura duhe nga ani nga kpakpa aboro, aboro ima rugatiyo na gupai nga ngbanda kinaho si aidanga boro mangipai ki da ti ni ya, na aboro rengbe arengba ka za tiyo ti manga irairapai. Badungu aboro aima ida kuti gupai nga kparakparapai kinaho dagba gu ziree boro ainongo aino ka gumbaha ya na gu boro ataino aino kini gumbaha. Na kparakparapai kinaho ti gu béno boro ataino aino kini mangihe na gu boro ainongo aino ka mangaha ya. Zavura agu aboro aboro abiyo nga pai tiyo te, i du namanga kere gbegberẽ apai gbe.

 Gine nasa aboro i naamanga gbegberẽ apai? Ziazia Kekeapai nagumba ndu gupai furani aboro ataino aino ti ni kini mangi gbegberẽ apai. Oni bingo gupai si agumbaha.

▪ “Rungosi boro nasa iratatamana wa mumungo boro ni rengo.”​—BATUNGUSIPAI 7:7.

Ziazia Kekeapai nape gupai one nga, ti kura aregbo, kura apai rengbe arengba ka sa boro ní mangi gupai ní naaidanga aida ka mangaha ya. Kura aboro rengbe ka mangapai nizuũ mbiko i bihe nga si nga gu yangarapai ka i mangihe tipa gu irairaapai namanga rogo gayó ringara. Buku sa nayaa: “Gupai nasa aboro gbe i naamanga sunge abamoi nga, rago nagberã tiyo mbiko agu apai irangbii amangaha na agu apai aboro amangaha gbiati agu apai nabipa marã.”—Urban Terrorism.

▪ “Nyemu marã nga tarã ngbatunga gbegberẽapai dũ.”​—1 TIMOTEO 6:​10.

Kura aboro nayawee zavura wene aboro, i rengbe arengba ka kuo ndiko ka i fu marã fuyó i mangihe wo. Zavura agu aboro namanga tiyo nga wene aboro nga yó ho adunga marã ni beyo ya, i nada nigbegberẽ aboro na nikere aboro ho du marã ni beyo. Oni berẽnga pa gu kereapai aboro amangaha ningbaduse, nga dia ga boro he beni niauro watadu ka pe zire ka diaha, biriki, mobirimo, gbiati imo boro.

▪ “Bambiko wa i afu nga mbusa ni ipo fu bamangi gbigbitapai i nisari ngbanga ni ya, si du wiri aboro afu kpotoyo yo ti ni sa manga kina gbigbitapai.”​—BATUNGUSIPAI 8:11.

Gi sangba ziazia kekeapai re ima gumba ndu gupai nasa aboro i berẽ gupai nga boro ima rengba ka dia he watadu ka manga gbegberẽpai ka si du nga irangbii abingo ní nani te. Si du nasa aboro i naaora kere ato ti agu agene si aidanga i oro ti ni wo ya, na aguyo kini dĩ pai ti regbo asada sukuru yo na aguyo kini mangi kura gbegberẽ apai ho i abi gupai ni nga boro ho nabiyo nani te. Zavura agu aboro a kaa manganga gbegberẽ apai wo ya, ho i abi gupai ni i abingo yó na gupai i amangaha te, watadu ho adunga andiko ni niʹiigiraha tipa pai ya, si nasa aboro i naamanga gu gbegberẽ apai ka i naamanganga ha ya. Waraga apangbanga sa nape gupai nga: “Ho aboro-ringara abi gupai ni nga aboro namanga kereapai ka i afunga mbusa fuyó ya, si nasayo i tona ka manga kereapai kisusi.”—Arguments and Facts.

▪ “Boro du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni. Gu nyemuhe nga ga borose, fuo du he na mobara, si ki vungu ingapai.” —YAKOBA 1:14, 15.

Aboro dunduko rengbe ka duna iraira berãpai. Aʹuru dũ ani agbiatirani na badungu agu apai rengbe ka sa rani ani mangi ingapai. Ti agu aregbo i aakeka Ziazia Kekeapai ti ni, i agumba gupai fu aKristano nga: “A nga asada ye sa roni te, kina gu ka boro hi he ahi.” (1 AKorindo 10:13) Wa vura duhe wo, si naruriipa gu diaberã boro amangaha, ka dia berãni  niipo ti gbegberẽ aberã watadu kaa berãha aberã kindi ki mbugene fuhe si sono. Gu sangba ziazia kekeapai du kuari rogo Yakoba re nazahe ti mbugene fu gbegberẽ nyemuhe si du na “mobara” ki kusi gbegberẽpai.

▪ “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.” —ASANZA 13:20.

Agu aboro ani akodatirani naayó ima rengba ka sa rani ani mangi gupai du niwenehe watadu nigbegberẽhe. Dedede, aboro namanga agu apai duna gbegberẽ asangbanaha bambiko akurayó nasosoda yó. Gu fugo Ziazia Kekeapai nga “mumungo aboro,” si tipa agu aboro adunga na tatamana tiyo ya te, ono si tipa agu aboro amanganga sunge na gu rugute du rogo Fugo Mbori yo ya. Si naida paranga aboro na sosono aboro sia gayó abadiakodatise nitatamana, nga agu aboro nandu kuti sangba Ziazia Kekeapai, si du ka i rengbe ti ni kadu naa kido nga ‘ima azianga’ yó naayó wa sa te.

Agi averesi re na agu kuraha nagumba ndu gupai furani zavura agu aboro kaa manganga gbegberẽ apai ya amangaha amanga ti ni, i ki vura inoaino vurũ. Si niwenepai ka rugatise na gupai nasa aboro i naamanga gbegberẽ apai. Ono ya mo maabangirise ho nga aboro aʹaria sinoyo kidu niwene yó? Nirengo, Ziazia Kekeapai agumbanga kina ndu gupai sa aboro amanga gbegberẽ apai ti ni te, ono si nakido rani a nga gbegberẽ apai nika digo adigo. Agi akidohe re nga gine? Ya mo gu gbegberẽ apai dunduko namanga rogo zegino adigo? Gu kekepai naye fuo gere nika karagapai sa agi asanahe re.