Agedi Gaani Awaraga Nasanahe . . .

Ya mo raka Paradizo yo nyeanye kindi akpasira?

▪ Ziazia Kekeapai nafu gu maabangirise nga ka raka nyeanye kindi rogo Paradizo auru kpotosende. (Atambuahe 37:29; Ruka 23:43) Ya mo raka zanga digidoho dagba rengberengbe aboro akpasira?

Si nga gu bawene sanahe si aida ani inipai tipaha. Abawisigipai bi gupai nga bataome boro be pai rengbe ka sa boro ní naabakabangirini, ní duna bakere gberarago, na ní berẽpa manga gbegberẽpai. Agu aboro nabi gupai nga ndupai ho i araka ti ni te watadu nambu be agu apai i amangaha na aʹuru dunduko, raka ima rengba kadu fuyó nikpakpasiraha. Ya mo agu aboro nika raka Paradizo yo adunga na ndupai beyó tipa kaa raka te? Ya mo agu apai i nikaa mangaha rogo raka yo akpasira akpasira?

Nibambatapai, oni ini gupai nga, Yekova Mbori, nga baenge ke Ziazia Kekeapai, fu gu maabangirise du tipa nyenye unga re. (Yoane 3:16; 2 Timoteo 3:16) Bambata sino Mbori nga nyemuse. (1 Yoane 4:8) Yekova na dudunguro nyemuse koyo du ani ni, na ko aima fu gu wene ahe ani agbia ngbarago awere behe.​—Yakoba 1:17.

Bakusirani ima ino gupai nga, tipa ani duna ngbarago, ani naida gu sunge nikaa kusa sangbanaha niwenehe. (Atambuahe 139:14-16; Batungusipai 3:12) Rogo Paradizo, raka aduna rogoyo ti ni na kidu na nyemuhe ti ni. Gu sunge aboro nikaa mangaha, i nikaa gbia undo agbia behe na abadiangbayo. (Yesaya 65:22-24) Ka si du nga oni namanga gu sunge ti aregbo dũ duna wene zuzuhe ti ni, ya mo si rengbe ka kpasira?

Oni ini gupai berewe nga, Yekova Mbori ambunga gene fu ai boro ní raki Paradizo yo te. Ko nafu gu gamunihe nga ga nyenye unga sa fu kina agu aboro nawirika ka mangapai wa wiriko nga Yesu. (Yoane 17:3) Ho Yesu aduni auru kpotosende, ko aduna ngbarago ka manga gupai Bako akpinyemuhe. Ko ayugu gupai fu apefuoko rogo fugo yo na rogo mangapai yo nga, nyenye ngbarago naye gbe be gamahe kisusi ho boro adia he ni. (Amokedi 20:35) Ho i nika karaga Paradizo ni, aboro dunduko nika raka ringbisihe kuti gu bakumba arugute du ue, nga gudu tipa kpinyemu Mbori na kpinyemu akurase. (Matayo 22:36-40) Oni moingo kpia gupai ku berãroni yo nga ka raka dagba agu aboro nakpinyemu roni na kini kpinyemu gayó sunge! Ya mo oni naberã gupai nga oni rengbe ka mbu watadu raka rengbe ka kpasira rogo ngbatunga ba wa gure?

Ginipai berewe raka rogo Paradizo nika kodaha? Ani nikaa wirika vovo apai tipa Bakusirani na aʹuru dunduko. Wene abawisigipai aima biko dungu goapai nga gudu tipa agu ahe Yekova amangihe. (ARomo 1:20) Kada ku awere, ani rugutirani gbua na kina wiri bete apai tipa ga Yekova kusikusiahe. Dungu akutu agarã kusayo, gu ruru kumba nangia Eyobo aberẽ kuriipa gu kusikusiahe nga ga Mbori, na fugoko nga kina rengo kindi. Eyobo ayaa: “Agi apai re nga kina bete [ga Mbori] apai; ani nagia kina rukutu wiri apai tipa ko! Ono woro su gako tandu, da rengbe na ruga tini na ni?”​—Eyobo 26:14.

Ka ani vura raka nyeanye kindi, ka ani iningo apai dunduko tipa Yekova Mbori na gako asunge te. Ziazia Kekeapai nayawee Mbori amoi nyemu gupai ku kpoto aboro yo nga i raki nyeanye kindi. Ono si naya berewe a wee ka ani ‘rengbenga na ina gu mangaapai Mbori amangi ti tonatona rago dati digida ha te.’ (Batungusipai 3:10, 11) Ya mo oni naberã gupai ngawee wirika vovo apai tipa Bakusiahe akpasira akpasira furoni?

Zavura awere, agu aboro namangasunge ka undo akurayó na si kini ye na ngbarago fu Mbori, gu sunge re akpasiranga fuyó te. Si naida ani duna gu kido nga, ka ani fu tirani kindi kaa manga ngbatunga gu sunge re, si kpasiranga te, watadu omerani batingo te, ka ani vura ka raka nyeanye kindi vurũ.

[Gu sura du ti kpewaraga 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/​NASA)