ONO TIE, agu aboro nasongoda gupai nga ga koda idapase gayo bipai kia. Eboo Patel nga batona gu riigbu du rimoho nga Interfaith Youth Core aya: ‘Pambori ho zanga nunga aboro, aberãnga tipa pa banda kurukuru ahe, na adianga aboro kugume ya te.’

Ni rengo, aBuddhists, aKatoriko, aGarasisi, aHindu, aMasarami gbiati gu kura aboro naakoda tiyo akoda ti gu kura aregbo tipa ka sovura kuti arungo, gu rengo nga ga aboro, ka zahe ti agu abundu i akpisidoho sende yo, watadu ka zahe ti gbarasa rukuruku ahe. Dungu apambori ni bakiakia naakoda tiyo ti kura aregbo ka sakapai tipa wai rengbe aboro ka sungo sa na kini ngarasi tiyo. I namanga bakere pumbo kini zigi awe, nita amanzigo, kparakpee, gbiati kura apai.

Ya mo pa vundo apambori nga gu gene rengbe yo ka nyasa riipa agu akpakara du dagba apambori? Ya mo pa koda idapase nga gu gene Mbori aida ka ye wene zegino ngbaha?

Gu kura riigbu nga ga koda idapase naya si na aboro behe nga 200 du rogo apambori ni bakiakia na rogo aringara 76. Gu banguapai si aida ka mangaha nga “aidipase koditiyo nyeanye kindi na wene giatise dagbayo.” Ono pepehe ipi ti mangimangihe. Ni kpiapai, ringbisihe kuti agu aboro nambakada apai yo, i adu na rubangirise tipa ka ke gayo arugute tipa gupai nga ka si funga gberarago fu agu aidipase du yo ni bakiakia ya, na ka zanga ba gberarago ti agu apambori naidi na gi waraga re. Tipagine? Kpakarapai adu tipa rimo Mbori singia i rengbe ka maaha koyo. Fuo gipai re, i arimisongo rimo Mbori koyo wagusa te.

Kangia rimo Mbori yo te, ginipai koda idapase amangaha? Kurigure, ya mo kparakparapai ho dagba gu ngbatunga mangapai nga ga koda idapase re na gu kura ariigbu ninaafu undo fu aboro? Si du nga ndu gupai gu riigbu nga ga koda idapase ani nifura tipaha mbata re aya tipa tihe wẽ, anga si nga riigbu pambori te, ono si “nadungura kura ariigbu si du sa.”

Kura bakere pa boro nga Dalai Lama nga ga gu riigbu nakoda idapase aya: “Apambori dunduko  namanga kina bangisapai sa nga: nyemuse, nunga, na mbupai fu kura aboro.” Ko aya berewe wẽ: “Gupai nyakipaha nga si naida agi asino re du ni papara gaani raka naˈuru dunduko.”

Nirengo, agu asino nga nyemuse, nunga, na mbupai ima nyaka. Rogo gu ga Yesu Rugute Duwa Dahabu ko aya: “Agu apai dunduko oni akpi nyemu aboro nimangi he fu roni, oni nimángi kina ha fu yo a.” (Matayo 7:12) Ya mo ndikidi idapase nga manga weneapai gbua fu aboro?

Dagba gu dungu aboro naamangasunge fu Mbori ti rago gu mokedi nangia Pauro, ko aya: “Mi nga dezire yo ya nyemu Mbori ti yo ono ku sangba inahe yo te.” Ginipai naamanga yo? Pauro aya: “Bambiko wa i aina nga waĩ Mbori asa yo ni ruru yo ya, i ki nigbata pa du ni ruru yo ni tiyo.” (ARomo 10:2, 3) Pa zanga yo ndikidi inohe tipa gupai Mbori aaida i mangihe asa gayo nyemupai na idapase si du gbua.—Matayo 7:21-23.

Yesu aya: “Aboro maku nga aboro azarõ.” (Matayo 5:9) Ko anaamanga gupai ko anaatungusaha zanga zuu, na ko anaafura tipa gu pangbanga nga ga zereda fu ngbatunga aboro dunduko na gayo apambori. (Matayo 26:52) Agu aboro naadegatuyo sa gako pai, i adu na nyanyaki nyemuse dagbatiyo. (AKorosaio 3:14) Ya mo gupai Yesu aaidaha gbua nga ka koda agu aboro naadu rogo apambori ni bakiakia tipa i du na pazereda dagbatiyo? Ya mo ko akodi tiko na aguyo ku rogo gayo pambori yo?

Agu abarumbatayo naadu rogo gu sangisangi pambori nangia aFarusi na aSadoke aaidanga na Yesu te, na i ki gbata gene ka imoko. Ginipai ko amangihe? Ko aya fu gako abawiriki wẽ: “Oni he yo ahe; i nga angbembatayo fu aboro ni airavurari.” (Matayo 15:14) Yesu aaidanga ka manga gu pagume nga ga toro na ngbatunga agi aboro re te.

Fuo bete regbo kusa, dungurati nga ga aKristano akuru ringara aGiriki yo rogo gu gbata nga Korinda nga gu gbata naadu na dungu ngbatunga aboro rogoho gbiati apambori ni bakiakia. Agu aKristano naadu yo amangi wai? Gu mokedi nangia Pauro akepai fuyo ki ya: “Ka i kpamia nga roni na azangaidapase wa si arengba nga ya.” Tipagine? Ko ape kurapai nga: “Gini zereda ka du dagba Kristo na gbegberẽ sino aboro? na gini pai ka du dagba idipase na zangaidapase?” Fuani, ko afu rugute fuyo ki ya: “Wa du he were oni kúru dagba yo yo, ki kparaka.”—2 AKorindo 6:14, 15, 17.

Nirengo, Ziazia Kekeapai nafura afura tipa koda idapase. Oni ima rengba ka baka bangironi nga, ‘Ginihe rengbe ka ye na ndikidi kodatise?’

Ziazia Kekeapai na ga Mbori arugute rogoho na si rengbe ka undo rani. Ani rengbe ka maa mburu gaani raka rii gupai Ziazia Kekeapai apehe. Agu aboro dihe kugume ima diabe agu asogote nga ga angbatunga gbiati iraira bipai tipa akurayo na ki wiriki wai ka mangapai nayo rogo zereda gbiati kodatise. Mbori afura tipa gipai re ku mbatayo ki ya: “Ii, ti gu rago re mi asá gu fugo nga ga aboro ni nzunzu fugo, ya i dunduko ki yambu he ti rimo Yekova ki nimangi pako kina ku bani sa.” Kodatise naye mbiko “nzunzu fugo,” nga gu gene Mbori aida aboro irisiko ngbaha.—Zefania 3:9; Yesaya 2:2-4.

ADezire Yekova nayambaro mo ye ku rogo gu gayo Bambu Kindo du barambeda na mo tipa ka bi gu ndikidi zereda na kodatise du dagbayo.—Atambuahe 133:1.