Ya mo mo aidanga kuti gupai nga ka aboro-ringara du nga airabiriki, gu zogarago du rogo gayo ringara nadu na kere biriki te? Kangia wo duhe, tipa zogarago du zanga biriki, si naida si ye rogo gu kura ba kia. Ziazia Kekeapai naya gu zogarago re nga ga Mbori Kindo, nga gu Yesu ayugupai fu gako abawiriki i nikpari tipaha.​—Matayo 6:9, 10.

Ga Mbori Kindo nga ndikidi zogarago nazogarago ngbangbaturũ yo. Si nika diaba agu azogarago nga ga aboro dunduko. (Atambuahe 2:8, 9; Yugoti 16:14; 19:19-21) Dagba agu amaku ga Mbori Kindo nika ye na ni, gu sa nga si nika nyasariipa biriki kusayo. Mo bingo agu apai sita ga Mbori Kindo nika mangaha.

GUPAI DU TIPAHA: Aboro du ninaafu marã tipa si nisongodi gu zogarago nga ga aboro, gbe rogo marã-ngbeti, na kura asunge. Gi bakere marã aboro afuhe re nasa gu kura abangbembatayo i nidĩ he, na aguyo kini di marã mobirimo be agu aboro naida i umbasi marã-ngbeti fuyo, watadu gu marã agbia-ngbii aidaha. Gipai re nakusa kpakarapai, agbia-ngbii nakiiso marã-ngbeti kuari tipa wa ka gu marã re karagatihe kubaha, na gipai re kini sa gupai berewe nga sunge biriki nindu kina ku mbatayo. Rogo ngbatungapai wa gure, agu aboro du ni ruruyo narungo ni bakerehe kisusi.

GU ZIGA DU TIPAHA: Ga Mbori Kindo nagbia gaha ome be gu Mbori du na Tanduapai Dũ nga Yekova. * (Yugoti 11:15) Ndupai ho tipa si dungura marã-ngbeti ka mangasunge na ni te. Kuba gure, “gu babakere ome nga ga gako tandu” gbiati gako nyemu gamahe nasa gupai nga ga Mbori Kindo gamu ahe fu agu aboro du nazingo dunduko.​—Yesaya 40:26; Atambuahe 145:16.

GUPAI DU TIPA NI: Susan Rose-Ackerman fugori nidu rogo gu kekeapai ye mbata fu gere aya, tipa ka nyasariipa biriki, “si naida i tonaha ti agu boro du na pagbia beyo.” Aboro naadunga na ngbarago ka bi gupai nga agbia-ngbii naasada ka nyasariipa sunge biriki dagba apurusi watadu agu aboro naroga marã-ngbeti ono kini mbu kikindigipa aboro te. Zavura gu bazogo aboro abihe nga ni du du ni ruru ni, ni nga kina boro ingapai. A wa Ziazia Kekeapai apehe, “a nga ruru boro auru kpotosende no namanga wenepai” ti aregbo dunduko te.​—Batungusipai 7:20.

GU ZIGA DU TIPAHA: Yesu Kristo Mbori nasia ko ko du ni Bazogo ga Mbori Kindo ko wa aboro du na ingapai tiyo te, ko arengbenga ka manga gupai du ni gbegberẽhe te. Ko aka fu Bakitingbanga ho ko aida ka biriko ko ni ka fu agu ‘angbi fuko nga ga zegino dunduko, na gaha taarimo.’ Bakitingbanga akido Yesu nga ka ko irisiko, ko nika fu agi ahe re fuko. (Matayo 4:8-10; Yoane 14:30) Zavura ti gu regbo i arungosiko, ko adiberã ka nye ni ruruko fu Mbori ki zanga mbira gu kakai imekakue ka di bete igirã tiko na ki vundu riko yo. (Matayo 27:34) Fuo Mbori zingisi Yesu ko ki ga ku ngbangbaturũ yo, ko ayuguhe nga ko ima rẽ kadu ni bazogo ga Mbori Kindo.​—AFiripoio 2:8-11.

GUPAI DU TIPAHA: Dungu aringara naaba waraga dedede, ndu ba gu waraga re nga ka dia agu abarumbatayo  nga airadi kusayo biro yo. Ono tie, gu rengo duho nga, gu bawaraga re naye na kina biriki berewe zavura rogo agu aringara niima sona. Ti regbo bawaraga, agu aboro du na bakere marã beyo nagbarasa ri agu aboro yo agbarasa du na pagbia beyo.

Gu basapungbanga nga John Paul Stevens du rogo gu Bape-ngbanga Nga ga Amerika, ko aya gu ngbatunga maapai re agbarasanga “kina pa wai aboro abi abazogo te, ono gu maabangirise du yo na ni kutiyo.” Si du nga ndu gupai dungu aboro rogo zegino dunduko naidi kuti gupai ti ni nga, agu aboro gasi be sunge biriki nga aboro birĩ-zogarago.

GU ZIGA DU TIPAHA: Ga Mbori Kindo nika nyasariipa abawaraga kusayo gbiati dĩ agu awaraga aboro abaha mbiko si nika nyeanye kindi. (Daniere 7:13, 14) Wa duhe nga Mbori du sia gaha Bazogo, sunge adunga tipa bawaraga watadu ka dia gaha bazogo kusayo te. Pa nyakaha nayugo gupai nga agu apai si nika mangaha dedede adu ni wenehe tipa agu aboro nika raka yo.

GUPAI DU TIPAHA: Ti tonatonaha, mo rengbe ka bihe nga kusa vovo andiko rengbe ka dia biriki kusayo. Ono tie, wene abainipai tipa andiko bi gupai nga kusa dungu andiko nazakagene fu bakere biriki. Kurigure, agu abasunge nasovura kuti biriki navura mangasunge na marã tipa ka umbasi biriki, fuo gayo sunge akiongo te.

GU ZIGA DU TIPAHA: Agu andiko nga ga ga Mbori Kindo ima ngba kisusi agu andiko nga ga agu azogarago nga ga aboro. Ni kpiapai, kuba gupai nga Yesu mangisunge na dungu andiko, ko amangisunge na gu Rugute Duwa Dahabu. Ko aya: “Agu apai dunduko oni akpi nyemu aboro nimangi he fu roni, oni nimángi kina ha fu yo a.” (Matayo 7:12) Gu nyakipaha gbe nga, agu andiko nga ga Kindo nabipa gupai nasa boro ni mangipai. Yesu aya: “Mo nikpí nyemu kuaro wa mo akpi nyemu tiro.” (Matayo 22:39) Rengo ngaha nga, Mbori nga gu boro nawisigo kpoto aboro yo, ko ima rengba ka sa aboro i mangipai kuti agu andiko re.​—1 Samuere 16:7.

GUPAI DU TIPAHA: Gbangbati gbiati angbu nga mburu gupai naye na biriki. Agbia-ngbii gbiati  aboro-ringara dunduko du na agu sino re tiyo. Gu bambu naati kurii aboro rogo gu gbata nga Seoul yo ani afura tipaha rogo gu kekeapai ye mbata fu gere, abadudua abambu afu marã mobirimo fu abarumbatayo tipa i mbuyo wa ka i duadua agu abambu anyakanga ya du marãha kusende.

Sidu, tipa ka nyasariipa biriki, si naida i yugupai ayugo fu aboro tipa wai rengbe yo ka nyasariipa gu angbu na gbangbati du tiyo. Ono tie, nyemu manga gupai re ti gu zogarago nga ga aboro te, na ome beyo tipa ka mbakadapai tipa ngbatunga gu yugopai re a te.

GU ZIGA DU TIPAHA: Ga Mbori Kindo nanyasa riipa biriki kusayo ni yugopai fu aboro tipa wai rengbe yo ka nyasariipa gu gbegberẽ ndu mangaapai du rogoyo yo. * Gi yugopai re naundo yo i du ‘ni vovo yo rogo gu toro yo nga ga gayo berã.’ (AEfeso 4:23) I nadia angbu gbiati gbangbati kusayo na kini rengbe kina be agu ahe du beyo.​—AFiripoio 2:4; 1 Timoteo 6:6.

GUPAI DU TIPA YO: Agu aboro du na bakere inohe tipa biriki pe gupai nga, ka i vura sonosa aboro kina rogo gini ngbatunga wene ba na i ki vura gbia gini ngbatunga wene yugopai vurũ, aguyo nasia kadu ni airabiriki. Na gere nga ndu gupai kpakaraha ti ni fu agbia-ngbii i nyasiriipa ha. Gupai bi yo ho nga i ima rengba ka gbiso betehe kusende anginga ka nyasariipa ha ya.

GU ZIGA DU TIPAHA: Gu riigbu nga United Nations Convention Against Corruption aya, tipa ka nyasariipa biriki, si naida agbia-ngbii “kakuti ruru mangapai, pe rengo, na kini fu mbusa fu agu aboro namangaha.” Wa vura duhe nga gipai re ni wenehe, ga Mbori Kindo asanga aboro gbua i du na agu asino re te, ono si nga agu asino si aidaha be avuruhe. Ziazia Kekeapai naya ‘airakpihe’ watadu airagbangbati na “airazire” i adianga kumbo ga Mbori Ngbii te.​—1 AKorindo 6:9-11; Yugoti 21:8.

Aboro ima rengba ka manga ome tipa ka raka ringbisihe na gu nyanyakipa arugute du tipa ruru mangapai re a wa si adu tipa bambata aKristano. Ni kpiapai, ho gu bawiriki nangia Simona aasadi ni ka ngbe ziazia toro be amokedi, i aka gu gako sunge biriki re na ki ya fuko: “Mo zúngadi tiro ti gi gamo gbegberẽpai re.” Ho Simona abi gu kerepai ni naadu ti gi gako nyemupai re, ko aya fu amokedi i kpari tipa ko wa ka ko dibe gu gbegberẽpai re kusayo.​—Amokedi 8:18-24.

Ka si vurangia kina gini ngbatunga boro nga mo, momu kina bero tipa kada ni vuru ga Mbori Kindo. (Amokedi 10:34, 35) Gu mbakadapai du tipa gu yugopai nga ga Kindo namanga rogo zegino dunduko awere, si ima rengba ka undo ro. ADezire Yekova adu na angbarago ka yugo wai i awisigo Ziazia Kekeapai na aboro foro, na si rengbe ka dia aminiti wa bawe rogo aposo ni basasa. Gu kurapai rengbe mo ka wirikapai tipaha berewe nga, “gu wene pangbanga nga ga ga Mbori ngbi,” kodihe na wai si nika nyasariipa gu biriki du rogo zogarago kusayo. (Ruka 4:43) Ani nazungadi ro mo gbata aDezire Yekova rogo gamu dagbarago watadu mo bi gu gaani bangiriba nga ga Internet nga www.ps8318.com/zne.