1, 2. (a) Tipagine idi mo ti ni kuti gupai nga Yekova nakpinyemu gako aboro akpi? (b) Gini nyemupai i akusi aboro na ni?

TIPAGINE idi mo ti ni kuti gupai nga Yekova nakpinyemu gako aboro akpi? Mbata fu mo karagapai kuti gu sanahe re, mo bingo agi akpipai re: Tipa dungu agarã, awirina rogo dungurati angarasi wirinarani nga Taylene ri du na ruru bipai tipa tiri nga ri arengba nga ka manga apai dunduko ni wenehe te. Ri aya: “Ka Yekova aakpingo nyemu re ya, ka ko anyenga kaa ruga re aruga kindi te.” Brigitte kumbari aima kpi na ri ki sonosi awiiri ue nisari aya: “Kere kpakarapai du ngaha ka sonosa agude rogo gi ga Satana zegino re, gbe, fu gu vungu gude adunga na gani badiarogatise ya. Ono mi na kido nga Yekova nakpinyemu re akpi mbiko ko aima undo re ti agu aregbo mi anaakpara kidu na rungo kpotoreyo, na ko aambunga re ome apai furii re te.” (1 Kor. 10:13) Sandra anaasota na gu kaza ka u nga ya. Ti regbo bakere dunguratise, dia kura wirina ayugu weneringise furi. Kumbaku Sandra aya, “Wa vura duhe nga ani ainongo ri nzunzu te, gu gene ri aberẽpa rani ngbaha aye na ngbarago furani. Zavura gu wiripai wirina animangihe tooni ka yugo gani nyemuse, ayugu wai fere Yekova akpinyemu rani.”

 ² I akusi aboro na gu nyemupai nga i kpinyemu kura aboro na aboro kpinyemuyo a. Si taata rago gberẽ ti boro ka ni ambisa nga gu nyemupai re ya mbiko tunguotunguopai watadu mbiko agu apai du wa gberãrago, akaza, zingo marã, watadu mbiko zanga du na diabese gene tungusapai yo. Ka ani tona kaa bihe nga Yekova akpingo nyemurani berewe te, si naida ani tingidi gupai nga ko nabi rani na nyanyakipa rani na ko “nazada kumba” berani na kini undo rani. Bangiriko agonga tirani te ka ani nye ni rururani fuko.​—Yes. 41:13; 49:15.

3. Ginihe rengbe ka nyakasa gaani ida nga, ga Yekova nyemuse adigongo te?

³ Agu aboro ani nifura tipa yo kusayo re aima du na kido nga Mbori aima undoyo ti gu regbo i adu ngba kpakaraapai. Ani ima rengba ka idaha a nga Mbori na kina rani. (Tam. 118:6, 7) Gi kekeapai re nafura gbe tipa wai du ga Mbori nyemuse ni yuguyuguhe rogo (1) kusikusiahe, (2) Fugoko, (3) kparakpee, na (4) ga Yesu motumo. Ho ani aberã ni kurii gu weneapai Yekova namangihe furani, si rengbe arengba ka kiiso gaani tambuahe tipa gu gako nyemuse adigongo ya.​—Oni gedi Atambuahe 77:11, 12.

4. Ginihe berãkuriipa agu ahe Yekova akusihe ayugoho? (Oni bi gu sura du ti tonatonaha.)

⁴ Ya mo ani rengbe ka bi ga Yekova nyemuse kaa digongo ya rogo agu ahe ko akusihe? Ii, ani ima rengba bambiko kusikusiahe nayugopa ga Yekova nyemuse. (Rom. 1:20) Ko ambakadi kpotosende ni wenehe tipa ani raki rogoho. Ono tie, anga kina raka ko aida ani raki he gbua te. Ani naida ka ri riahe ari tipa kaa raka. Yekova amangi kpotosende rogo gu gene nga si nikusi badungu zukuzuku ahe nga gu rengbe ani ka mangaha ni wene riahe. Nirengo, ko amoi ri riahe ni guhe nafu ngbarago fu boro! (Batu. 9:7) Wirinarani du Canada yo nga Catherine naagbia ngbarago ti bi kusikusiahe, gu susi asusa gbe nga bara ti agu adiwi nga Marungu na Zerekpe. Ri aya: “Si ima iriwo ka bi rakirakiahe, ka bi wai mbumbudo akura ti sende na ka bi wai badungu azire ayego yo ami amere kuo ni, kodihe na agu andege ni naaye ka ri riahe pati gi bambu manga riahe. Yekova ima kpinyemu rani si du ko nakusi agu ahe ti ni nafu bakere ngbarago furani.” Barani du ngbangbaturũ yo nagbia bakere ngbarago ti agu ahe ko akusihe, na ko naida ani gbia ngbarago a ti ni.​—Amo. 14:16, 17.

5. Wai du du ga Yekova nyemuse ni yuguyuguhe rogo gu gene ko akusi aboro ngbaha?

⁵ Yekova akusi rani na gu tandu nga ani rengbe ka manga gu sunge du na wene surungbaha ti ni naye na ngbarago rogo raka yo. (Batu. 2:24) Gako ringbisapai angia aboro hiisi kpotosende, ki zogoho na ki nikindo auru atĩo na auru azire ari na unga anya dunduko. (Bam. P. 1:26-28) Nairiwo gu nyemuse du Yekova na ni wa ko afu agu asino furani nasarani ani wiriki ko!​—Ef. 5:1.

6. Tipagine si aida ti ni ani du na bakere tambuahe tipa Fugo Mbori?

⁶ Mbori ima yugo bakere nyemuse furani ni fuko Fugoko furani. Si nayugopai furani tipa ko na gako mangaapai na aboro. Ni kpiapai, Ziazia Kekeapai napepa wai furani ko amangipai na aYisaraere, nga agu aboro naana basasangba ko dedede. Atambuahe 78:38 naya: “Ko ahi be nunga aboro, ko anavu yo avu tipa gayo irairaapai, ka ko agbarasa nga yo ya; ko anasa gako zinga ti yo ku sa yo dedede, ko azingisa nga gako erã dunduko kuti yo te.”  Berãkurii gu veresi re rengbe ka undoro mo bihe nga Yekova nakpinyemuro akpi. Mo du nakido nga Yekova nabi ro abi na nyanyakipa ro.​—Oni gedi 1 Petero 5:6, 7.

7. Tipagine si aida ani bi Ziazia Kekeapai ti ni na nyanyakipaha?

⁷ Si naida ani bi Ziazia Kekeapai na paha kuari mbiko Mbori nafura furani rogo yo. Wene fugodagbase na nyanyakipaha dagba agude na avunguyo mbiko si nasayo i du na kido dagbatiyo na i nikpinyemu tiyo. Ginipai rengbe ani ka idaha be Yekova? Wa vura duhe nga regbo aadunga ho sa ani abi Mbori watadu ki gi fugoko te, ko “nafura” furani rogo Fugoko yo nga Ziazia Kekeapai, na si naida ani degeturani kutini. (Yes. 30:20, 21) Wangia ani ga Yekova kparakpara aboro, ko nakpinyemu ka ngbe furani ku mbatayo na ka banda rani be kereapai. Ko naida ani iniko na ani kido kutiko.​—Oni gedi Atambuahe 19:7-11; Asanza 1:33.

8, 9. Ginipai Yekova aida ani inihe? Oni yugungo ho na kpiapai rogo Ziazia Kekeapai.

⁸ Yekova naida ani iniko ni gu boro nakpinyemu rani na abingo kina gaani aingapai ya. Ko nagbata gu wenepai du tirani. (2 Peka 16:9) Ni kpiapai, ko amangihe wo nibipa gupai naadu tipa Bakindo Yosafata. Ti kura regbo sa, Yosafata amangi mumungopai nga ka ndu na Bakindo aYisaraere nga Aba tipa ka sovura kuti aSurio ka dia gu gbata nga Ramota-girada. Wa vura duhe nga zire anebi 400 akido Aba nga ko nika duadu na diabese, ga Yekova ndikidi nebi nangia Mikaya afura ku mbatayo ya ko adunga na diabese te. Aba akpi ba vurayo, na Yosafata ki bati  nga kpokoto. Fuo ko karagatiko ku Yerusarema yo, ko agbia rugute tipa koda tiko na Aba. Wa si avura duwo, Yeu wiri gu nebi nangia Anani aya fu Yosafata wẽ: “I abi bete wenepai ti ro.”​—2 Peka 18:​4, 5, 18-​22, 33, 34; 19:​1-3.

⁹ Ho Yosafata atona zogarago ni, ko afu rugapai fu abazogo, aRevi na aboromotumo nga i ta rogo agbata nga ga Yuda dunduko ka yugopai fu aboro tipa ga Yekova Ndiko. Gu tua re aima du na wene sangbanaha mbiko aboro rogo ringara dunduko atona ka gunde ti Yekova. (2 Peka 17:3-10) Nirengo, Yosafata aima manga pa mungo, ono bangiri Yekova aagonga ti gu weneapai ko amangihe te. Gi pangbanga nga ga Ziazia Kekeapai re natingida rani nga, wa vura duhe nga ani nga aboro ingapai, Yekova nikaa kpinyemu rani akpi kindi ka ani aida ka sa ngbarago ti ko na ngbadurani yo dũ.

10, 11. (a) Tipagine rengbe ani ka bi kparakpee ti ni ni wene gamahe be Yekova? (b) Wai du rengbe Mbori ka karagapai kuti gaani kparakpee?

¹⁰ Gu baagude du na nyemuse nadia regbo ka degatuni fu awirini ho i afura ni. Ko naida ka ino gayo abakabangirise mbiko ko naberãpa gupai du ngbaduyo yo. Gu Barani du ngbangbaturũ yo nga Yekova nadegatuko adega ho ani akpara ni fuko.

¹¹ Ani rengbe ka kpara fu Yekova ti aregbo dunduko. Ko azanga rani ti kparakpee te. Ko nga gu bakurearani du mbembedi ka degatuni furani ti aregbo dũ. Taylene, ani nifura tipa ri kusayo aya: “Mo rengbe ka pe apai dunduko fuko.” Ho ani ape agu apai ni fu Mbori du berãrani yo rogo kparakpee, ko rengbe ka karagapai furani vurube Ziazia Kekeapai, rogo kekeapai rogo magazini watadu wene fugo ngarasaro be wirinarani idipase. Yekova nagia gaani akpee zungoditise agia zavura ho boro agianga rani ni ya. Gako karagapai kuti gaani akparakpee nayugopa gako nyemuse nga gu ka digongo ya.

12. Tipagine si aida ti ni ani wisigi agu akparakpee du paha rogo Ziazia Kekeapai? Oni funga kpiapai.

¹² Ani ima rengba ka wirika badungu apai ti agu akparakpee du paha rogo Ziazia Kekeapai. Sidu tie, ka ani awisigo gu ngbatunga akparakpee re ti regbo gu irisombori nga ga aborokporo ti kura aregbo, si ima rengba ka undo rani. Berãkuriipa wai ga Yekova amoyambu anaakpara fuko bakuru kusayo, ima rengba ka undo rani ani mbakadi gaani kparakpee. Ni kpiapai, ga Yona kparakpee vuru batĩo yo. (Yona 1:17–2:10) Fugo gu kparakpee Soromo akparihe ti regbo kpara yekaru fu Yekova. (1 Aba. 8:22-53) Berãkuriipa gu kpia kparakpee Yesu amangihe tipa ani gbia undo. (Mt. 6:9-13) Gu susi asusa gbe nga, “oni yúgu gaoni sanahe fu Mbori” dedede. Ni sangbanaha, “gu zereda nga ga Mbori nagasi rugatinapai dunduko, si abánda kpotoroni yo na gaoni berã.” Gaani tambuahe tipa ga Yekova nyemuse adigongo ya nikaa sona kina ku mbatayo.​—Frp. 4:6, 7.

13. Gini momu gu wene mbakadapai nga ga ga Yesu motumo azakihe fu aboro?

¹³ Gu gamunihe nga ga Yesu motumo ani arẽnga tipa ha re ya, i afuhe furani tipa “ani du ni ungarani.” (1 Yo. 4:9) Ho Pauro afura ni tipa gu bakere nyemuse Mbori ayuguhe furani re, ko aya: “Kristo akpi ragoho tipa azangasinombori. Bambiko kpakara pai nga ha boro kpi tipa ruru boro, ono isoke gu ni nibasa apai abasa ka kpi  tipa wene boro. Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.” (Rom. 5:6-8) Gi bakere gene Mbori ayugu gako nyemuse ngbaha re azakigene fu aboro i du na gu maabangirise nga Mbori idi nayo.

14, 15. Ginihe ga Yesu motumo ayugoho fu (a) mbedimbedi aKristano? (b) agu aboro du na maabangirise ka raka auru kpotosende?

¹⁴ Kina mbedimbedi aKristano sa du gu ga Yekova nyemuse adigongo re ya fuyo ni kparakparaha. (Yo. 1:12, 13; 3:5-7) I da ni “awiri Mbori” mbiko i mbediyo na ziazia toro. (Rom. 8:5, 16) Pauro afura tipa yo ya ‘i azingisi yo na ko, na i ki sungu na ko rogo agu arago du ngbangbaturũ yo, rogo Kristo Yesu yo.’ (Ef. 2:6) I gbia gu bangiriba nga toro re mbiko gu ‘dezire nga ga Ziazia Toro kidohe, du nga gayo ũkumbo’ nga ‘gu maabangirise moi yo ho fuyo ngbangbaturũ yo.’​—Ef. 1:13, 14; Koro. 1:5.

¹⁵ Tipa gu badungu aboro namaa idapase kuti ga Yesu motumo, gene fuyo ni zazaha tipa i du ni abakurea Mbori na kidu na gu maabangirise nga Mbori adia yo adia ni awiriko na i ki raki nyeanye kindi rogo paradizo auru kpotosende. Sidu, ga Yesu motumo du Yekova ayugu gako nyemuse fu aboro rogoho. (Yo. 3:16) Ka ani du na maabangirise ka raka nyeanye kindi auru kpotosende na kini mangisunge fu Yekova ni ruru rani, ani rengbe arengba kadu na kido nga ko nika sa raka asa furani ni bawenehe rogo vovo zegino. Nangba wai rẽhe ani bi ga Yesu motumo ni gu bakere gopai nayugopa ga Yekova nyemuse nga gu adigongo ya!

16. Ginipai berã ani kurii gu badungu agene Yekova nayugu gako nyemuse ngbaha furani, amangaha?

¹⁶ Ani arengbanga ka geda gu badungu agene Yekova ayugo gu gako nyemuse ngbaha furani adigongo ya te. Gu bake papara atambuahe nga Davide abi bia nga: “Ako Mbori, ga berã pa re nga gu kikiipahe bangire! na nge pa geda ha a! Ka mi ageda ha, si ange ki susi ngume.” (Tam. 139:17, 18) Si naida ani mbu gi ngbatunga aberã re si sarani ani kpinyemu Yekova ni bakerehe wa ko akpinyemu rani na kini ngerefuo rani. Nirengo, ani mangi gupai du ni wenehe fuko na omerani dunduko.

17, 18. Gini bete agene duho rengbe ani ka yugo gaani nyemuse fu Mbori ngbaha?

¹⁷ Badungu agene duho rengbe ani ka yugo gaani nyemuse fu Yekova ngbaha. Ni kpiapai, ani nayugo nyemuse fu Mbori na fu gaani amurakporo ho ani atungusa pa Kindo ni fuyo zaaza. (Mt. 24:14; 28:19, 20) Ani nayugoho nga ani ima kpinyemu Yekova nzunzu ho ani ahi asada ni na kini kakuti gaani ruru mangaapai. (Oni gedi Atambuahe 84:11; Yakoba 1:2-5.) Ka si du nga aʹasada ima du furani ni kerehe, ani du na kido nga Mbori ima inopa gaani ambugo na ko nika undo rani aundo, bambiko parani ni nyanyaki bangiriko.​—Tam. 56:8.

¹⁸ Gaani nyemuse fu Yekova nafõngbadurani yo ani berẽkuriipa gako kusikusiahe na kura gako iiriwo mangaapai. Ani nayugoho nga ani ima kpinyemu Mbori na kini bi Fugoko na paha kuari ho ani amanga omeni kaa wisigo Ziazia Kekeapai. Nyemu Yekova nasarani ani mbedi na ko rogo kparakpee yo. Na ho ani aberãkurii ga Yesu motumo ni ko afuhe tipa gaani aingapai, gaani nyemuse tipa Mbori nasona kina ku mbatayo. (1 Yo. 2:1, 2) Gere gbua nga gu bete nduapai du berani tipa ka kpinyemu Yekova tipa gu gako nyemuse du furani adigongo ya.