Oó. Ziazia Kekeapai nayugo gupai nga si naida ani kpari sa fu kina Mbori, ti rimo Yesu. Yesu aya fu gako abawiriki: “Were du oni nikaa kpara: Barani du ngbangbaturũ yo, ani írisi rimoro airisa.” (Matayo 6:9, New American Bible) Ko aaruganga gako abawiriki nga i niikpari fu asanto, amaraika, watadu fu kura boro kpara kusayo ti Mbori te.

 Yesu ape gupai fu apefuoko a nga: “Mi nga gene, nga rengo, nga unga a. A nga boro sa ka ye koyo du Buba ni gbua te, kina mbiko re.” (Yoane 14:6, NAB) Kina Yesu sa Mbori namoiko ko naakpara tipa rani.—AEbere 7:25.

Na ka si du nga mi nakpara fu Mbori na kini kpari a fu asanto?

 Ni papara Agu aNdiko Naadu Bawe, Mbori aya: “Mi nga GBIA, nga gamo Mbori, nga iraringo Mbori.” (Gate 20:5, NAB) Rogo gini gene du Mbori ni “iraringo” Mbori? Gu rukutu kekeapai du rogo gu Baibiri nga New American Bible nape gupai nga ko “naida ra ni gose du sa fu kina ko.” Mbori naida gupai nga ra ni gose watadu iriso—kodihe na kparakpee—du sa fu kinako.—Yesaya 48:11.

 Ani naba gberãrago ti Mbori ka ani akpara fu kura boro kia, zavura fu asanto watadu ziazia amaraika. Ho gu mokedi nangia Yoane aasadi ni ka iriso maraika, gu maraika re arugusi ko ni ya ko fuko wẽ: “Ka mo mángi nga gure ya! Ani nga amoyambu na mo, na agu awirinamo naka kuti gu dezirepai nga ga Yesu. Mo írisi Mbori.”—Yugoti 19:10, NAB.