Órni Jesús bidxin gudx Betania ni noʼ gahxca Jerusalén, ximigbu Lázaro ma bisaʼ tap govitz de goló goity. Jesús né guiropca bisan Lázaro, Marta né María goyee roʼ baʼ. Órcuca xidalguixo buñ bidop ronoʼyibu. ¿Ronylo pensary balaati bibaladx Marta né María órni Jesús golís Lázaro stoib la? Bíil Juan 11:21-24, 38-44.

Marta ma nambu diitz sacró ni sieed de Dios par buñ ni ma goity. Láabu biembu que Jehová salís gueʼet par guibany ló Gudxlio. Bíil Job 14:14, 15.

Buñgudxlio goyaʼ de yoo. (Génesis 2:7; 3:19) Diti nacno toib espíritu. Lóono nacno de runy né órni raityno diti noʼ ni rareʼ laidyno ni riée stoib lagary. Órni lóono raityno, xcalrrienno né xpensaryno láaca raityni. Por ngú, órni Lázaro biás lad gueʼet diti noʼ xí goníbu, portín gueʼet ma diti rien. Bíil Salmo 146:4; Eclesiastés 9:5, 6, 10.

¿Ragoʼ Dios a buñ ló guii órni raity la? La Biblia raslooy que gueʼet diti rien, galrrasuidy ni ná que buñ raʼij ló guii diti nigolúni portín raniʼni mal de Dios. Pensary reʼ que buñ raʼij ló guii, nadzabni nisló Dios. Bíil Jeremías 7:31.

Gueʼet diti labúu raniʼ né racadiag. (Salmo 115:17) Per noʼ tipnés ángeles ni nac mal, né ronyibu saapa buñ ni ma goity. (2 Pedro 2:4) Jehová raiby lóono que diti non guiyopyno mod guininéno gueʼet. Bíil Deuteronomio 18:10, 11.

Xidalguixo buñ ni ma goity sabany ló Gudxlio stoib. Hasta tipnés buñ ni diti bimbu a Jehová né buny cós mal siásyibu stoib. Bíil Lucas 23:43; Hechos 24:15.

Guirá ni guiás labúu guisuidyibu ni ná Dios, né pal guisobyibu saduidyni diitz que napyibu fe en Jesús. (Revelación 20:11-13) Buñ ni sabany stoib né rony cós tzaay labúu sabany sacroyen por tipzó ló Gudxlio. Bíil Juan 5:28, 29.

Par labúu guiás guirá buñ ni ma goity, Dios bixel xiin goity por lóono. Ni guirá buñ ni ma goity guiás, rientzaayni que Dios nap galnadxi né natzaaybu né lóono ná nacno buñ galkié. Órni gueʼet guiás, ¿chú láabu ngú nainy looy gooynélo diitz? Bíil Juan 3:16; Romanos 6:23.