Goyoʼ toib lagary ni góc laa Uz, né lagarycu bibany toib buñ ni bieen Jehová. Góc laabu Job né gócbu buñ ric né goyoʼ xidal xiimbu. Gócbu buñtzay né gocnébu buñ ni cadudy ló govinn, gocnébu buñgonaʼ ni ma goity tzeʼel né mbiox ni diti nap bixios. Job buny xidal cós tzaay. Per ¿xí por ni gócbu buñtzay dipa nadudybu ló galnagan la?

Job diti gonbu pal Buñdzab rabiʼ guirá ni ronybu. Jehová gochbu Buñdzab: «¿Ma bibiʼlo ximod rasob Job naʼ la? Yadi ni toib buñ xomod láabu ló Gudxlio. Rasobdiitzbu né ronybu cós tzaay». Buñdzab cuapybu Jehová: «Rasobdiitzbu looy portín ranlo láabu, rasiablo xilaaylo ronoʼbu, ronylo que guidal xinimalbu né raduidylo layoo láabu. Per pal rabeʼlo guirá ni napbu sasiambu looy». Jehová goniʼ: «Goleʼ guirá ni napbu, per diti guigaitylo láabu». ¿Xigony biduidy Jehová lagary que Buñdzab natuidybu Job ló galnagan? Portín gondxichbu que Job dipa nasian láabu.

Buñdzab bituidybu Job ló bisaʼ clas galnagan. Primer bunybu que tipnés buñ ni góc laa sabeos nabann guirá xiosbu né xporbu. Después goyaʼij guirá xilieen xtunybu. Bieed stipnés buñ ni góc laa caldeos né golann guirá xcameybu né bigaityibu buñ ni cayan layimu. Per goyoʼ toib desgrasy rodann, guirá xiimbu goity órni cayóyibu toibsi né yoʼ ro dxeeyibu biabni laidyibu. Job nigolú goyoʼ nabann per ná scú diti bisiambu Jehová.

Buñdzab bituidybu Job ló más galnagan  órni bunybu que guidopy laidy Job nareʼ gutz. Guirá gutzcu nigolú bisioʼobni láabu. Job diti gon xigony godudybu ló xiroʼ galnagan, ná scú bisobbu Jehová. Dios bibiʼbu que Job diti bisian láabu por ngú nigolú goyoʼ nakitbu.

Después Buñdzab biquiimbu tzón buñ par nagoʼyibu prueby Job. Gochyibu Job: «Bunylo galkié né diti nálo guisetlo láani. Por ngú Dios catuidy looy ló xiroʼ galnagan». Job cuapy layibu: «Diti buni ni toib galkié». Per después bunybu pensary que Jehová catuidy láabu ló galnagan né dada goniʼbu que Dios diti cayony xinésni.

Toib mbioxhlas ni góc laa Elihú bicadiagsi guirá ni goniʼyibu. Per bidxin midid goniʼbu: «Guirácato diti napto razón. Jehová nirodanbu diti labúu guienno mod nacbu, láabu dipa sonybu cós mal. Rabiʼbu guirá ni rac né racnébu buñ ló galnagan».

Jehová gochbu Job: «¿Pu noʼlo órni bisaʼya guibá né Gudxlio? ¿Xigony nálo que diti cayoni xinésni? Cuenunysi raniʼlo, per diti nanlo xigony racni». Job biduidy cuent que bichébu né goniʼbu: «Bichéya. Bialadx ni goniya. Tibueltcu bicadiaga de looy per nigoreʼ ma rimbutzaay looy né rabiʼya que labúu ronylo guirá ni raniiny looy».

Jehová bisial né biduidybu más xiroʼ cós a Job que nírcu órni bibiʼbu que Job diti bisian láabu ná godudybu ló xiroʼ galnagan. Job bibanybu goxtiguie por xidal íz. Jehová biduidy galnasác láabu portín guirá ór bisobbu ná gosac naganbu láani. ¿Looy ga? ¿Sonylo xomod Job la? ¿Sasobló Jehová guirá ór ná guisac naganlo láani la?