Órni ma yaaca gaity Jesús, láabu biiybu diitz né nosi tap xpiimbu: Pedro, Santiago, Juan né Andrés. Jesús gonabdiitz ni raquiin ganno, órni goníbu señal ni tzó que ma noʼbu né lóono ló dzú ni ma guidubylagá: «¿Chú láabu ngú, mós ni rony xinésni né naní xcalrrien ni xpixuan golú né bisiané guirá ni nap par guiduidy galrro órni caquiinni?» (Mateo 24:3, 45; Marcos 13:3, 4). Né diitzreʼ, Jesús xomod ni nac «bixuan», biduidy xtiitz que sabú toib grupo par guiduidy guirá ór xcalnan Dios a guirá ni racanal láabu ló dzú ni ma guidubylagá. ¿Chú guiduidy galnann reʼ?

Ndeʼ nac toib grupien ni rasob Jesús ni Dios golú. «Mós» reʼ radzaktzayni Tidxo Buñ ni nap xiroʼ Galnann ni Rasanir ni raduidy xcalnan Jehová merpa órni caquiinni. Raquiinno layibu par gapnó «galrro merpa xorni» (Lucas 12:42).

Ragonésni lidx Dios (1 Timoteo 3:15). Jesús bunycuent a grupo reʼ dxiin par ganyibu guirá ni nap xcudx Dios ló Gudxlio, xomod cós ni rasac, láaca layibu ragonésyibu xcudx Jehová par saa yoʼ por yoʼ né raquiinyibu congregación par guisuidyibu lóono xtiitz Dios. Por ngú par guicaʼno ni caquiinno órni merpa caquiinno láani «mós ni rony xinésni né naní xcalrrien» raduidyibu xcalnan Jehová, ronyibu láani ló guiich ni raquiindo órni ranido xtiitz Dios né láaca ni rasuidydo ló reunión né ló samblia.

«Mós» reʼ nacbu ni rasob portín racaatzaybu cuidad rasuidybu ni merpa sieed ló la Biblia, né rony cumplirbu ranibu diitz sacró ni sieed de Dios, láaca naní xcalrriembu portín racaatzaybu cuidad ximod guiquimbu guirá ni nap Cristo ló Gudxlio (Hechos 10:42). Rienni que Jehová casiab xilaay ló xchiimbu portín Testigos cadal ló Gudxlio né láaca cayac xiroʼ xcalnan Dios (Isaías 60:22; 65:13).

• ¿Chú láabu golú Jesús par guiduidy xcalnan Jehová a guirá ni racanal láabu?

• ¿Xigony ranino que «mós» reʼ rasob né naní xcalrrien?