Dzú ma gaity Jesús goníbu: «Diitz sacró xtuny Gobierno reʼ sioʼni ló guidopynac gudxlio par gann guiránac buñ láani, né ór cú guilox gudxliogoxreʼ» (Mateo 24:14). ¿Ximod labúu gann buñ diitz sacró reʼ ló guidopynac Gudxlio? Non guicanaldo mod ni bisian Jesús órni goyoʼbu ló Gudxlio (Lucas 8:1).

Riguendo buñ lidx. Jesús bisuidy a ni cuanal láabu que naniʼyibu diitz sacró yoʼ por yoʼ (Mateo 10:11-13; Hechos 5:42; 20:20). Biinreʼ ni bixel Jesús gosaayibu yoʼ por yoʼ, cuaʼyibu lagary ro goníyibu xtiitz Dios (Mateo 10:5, 6; 2 Corintios 10:13). Scúca ronydo ló naareʼ ma nánndo pu lagary guinido xtiitz Dios, né cada congregación ma nann pu goló guidxin par guiniʼ xtiitz Dios. Modreʼ rasobdo Jesús guinido xtiitz Dios par «ganyibu láani tibrodiguieʼ» (Hechos 10:42).

Rayopydo buñ rotísi noʼ. Jesús bislooy ximod guisuidydo stipnés buñ, láabu goníbu xtiitz Dios roʼ nisdaʼ né roʼ pós (Marcos 4:1; Juan 4:5-15). Lóodo láaca ronydo scúca raninédo buñ ni sieed ló la Biblia ronydo láani ló néz, ló negosy ro dxee buñ casaladx, né láaca raquiindo teléfono. Órni labúuni raninédo xtiitz Dios buñ ni rabés gahx ro rabésdo, ni rony dxiin toibsi né lóodo, ni riée scuel né lóodo né raninédo xfamilydo. Ndeʼ rony que xidalguixo buñ de guidopynac Gudxlio guicadiag «diitz sacró ni ralaa» (Salmo 96:2).

Buny pensary de toib buñ ni nainy looy guininélo diitz sacró de Gobierno xtuny Dios né ximod labúu gacné láabu ni Dios gony ló dzú ni sietra. Diitz sacró reʼ diti nosi looy gannlo láani. Goní xtiitz Dios órni noʼ toib oportunida par gonylo láani.

• ¿Xí «diitz sacró» non guinino?

• ¿Ximod lóodo ni nacdo Testigos rasuʼdo mod Jesús bisuidy?