PAL looy o xfamilo nap toib galguitz ni ragaity, ma nanlo balaati ragoʼni binaity ló galrrasaʼ. Diti nosi galguitzcu rastoʼbyni buñ, láaca nigolú ragoʼni buñ ló galrrasaʼ. Buñ radzuiby né rioʼ ló galrrasaʼ órni riee ló doctor, órni diti nap bidxiich par gac remeidy né órni remeidycu ratudy layibu ló galrrioʼob. Galrrasaʼ ni ragoʼ toib galguitz, labúu guistoʼbyni buñ.

¿Xí más labúu gacné lóono? Oración né textos ni sieed ló la Biblia láani ngú ni más rasialdó xcalnabany buñ. Láaca xcalnadxiʼ xfamilno né ximigno nacni toib galrracné rodann.

Robert, toib buñguieeu de 58 íz, ralitz lóono scareʼ: «Par labúu guicalólo xcalguitzlo, raquiin gaplo confianz lóo Dios, láabu sacnébu looy par gony guantarylo. Gonab lóo Jehová né góoch láabu ximod rasaclo. Gonab espíritu santo xtunybu né gonab láabu gacnébu looy gac nadiplo par labúu gacnélo xfamilo né diti guireʼganlo laʼga cacalólo xcalguitzlo».

Robert ná: «Nigolú rasac que xfamilo guisialdó xcalnabanylo, gacnéyibu looy. Guirá dzú, toibticayibu raniné naʼ por teléfono né ranabdiitzyibu pal labúuga noʼya. Ximiga ni rabés sit láaca racné naʼ. Ngú rony que guisaca sacró né racnéni naʼ par diti guireʼgana».

¿Noʼ ximiglo ni caxoʼ né cayonylo pensary tzáguenlo láabu la? Bibiʼ ni ná Linda: «Buñ ni caxoʼ, sigory diti guirá ór nainy guiniʼbu de xcalguitzbu. Por ngú, goniʼ stipnés cós».

Galnadip ni radudy Dios, xcalrracné la Biblia né xcalrronladx xfamilo né ximiglo labúu gacnéni looy guidudylo cuent que noʼ razón par guibanylo, ná caxoʼsiilo.