Goola ló íz 1927 lainy toib gudxyen gaxca Chicago (Illinois, Estados Unidos). Goyoʼ gáay xiin bixiosa né xinaʼya: Jetha, Don, de ngú naʼ, después Karl né Joy. Guirádo goniiny lóodo ñonydo xchiin Jehová né guidopy xcalnabanydo. Bisana Jetha goyee ni rarop scuel xtuny Galaad ló íz 1943. Don goyeebu Betel lainy gudx Brooklyn íz 1944, Karl goyee Betel íz 1947 né de ngú Joy goyee ló íz 1951. Ejemplo galán xtuny bisana né guionca buchi, né xtuny bixiosa né xinaʼya, nigolú gocnéni ná.

Bixiosa né xinaʼya biaʼyibu bíilyibu la Biblia né gondxiʼyibu Dios, por ngú bisuidyibu lóodo gandxiʼdo Dios. Per bixiosa ma diti gopbu respet religión después ni bibiguetbu ni goyeebu gudx Europa ló Primera Guerra Mundial. Xinaʼya nigolú biduʼdy guixquix por ni diti goity bixiosa ló guerr, né gochbu bixiosa: «Karl, tzoʼno guidaʼ, xomod nírcu». Bixiosa cuapy láabu: «Gony compañer looy per naʼ guiaʼana fuer». Xinaʼya cuapy láabu «¿xigony?». Bixiosa goniʼ: «Ló guerr bibiʼya ximod xobal de gadzéga gudx ni cadíil né saʼ biduʼdyibu xcalnasácyibu soldad ná gocyibu de toibsi religión. ¿¡Gocné Dios guiropcayibu la!?».

Después, laʼga xinaʼya goyoʼ lainy guidaʼ, bidxin chop testigos xtuny Jehová riolidxdo. Gochyibu bixiosa nacaʼ chop volúmenes xtuny libro ni góc laa Luz, ni goniʼ de libro xtuny Apocalipsis. Bixiosa goniiny ñan más né cuacuentbu librocu. Órni xinaʼya bibiʼ láani, bíilbu láani. De ngú, toibtica dzú bidzelbu toib anunys ló periódico ro caruʼ buñ guisuidy ni ná la Biblia ló chop volúmenes xtuny libro ni laa Luz, né goyeebu. Órni bidxinbu, toib sois golien cuacuent láabu. Xinaʼya bislooybu sois goliencu toibtica de libros reʼ né gonabdiitzbu: «¿Reʼ ro rasuidy buñ láani la?». Sois golien cu cuapy: «Scú, godudy maa». Stoib xomalcu, xinaʼya goyné lóodo. Né desde dzúcu, goyoʼdo guirá xomal.

Ló toib reunión, hermano ni sané reunióncu gonabbu naʼ ñoola ni ná Salmo 144:15, ro ná que buñ ni rony xchiin Jehová rioʼ nakit.  ¡Nigolú bioladxi textocu! Né láaca bioladxi sa chop versículos: 1 Timoteo 1:11, ro ná que Jehová nac Dios ni rabaladx, né Efesios 5:1, ro rony animarni lóono guisuʼno Dios. Por ngú biduʼdi cuent que non ñoʼya nakit né guirá cós ni ñoni por ni Bisaʼ naʼ né naduʼdi guixquix láabu por privilegio ni napa ni roni xchiimbu. Guiropca cós cu nigolú rasacni par naʼ.

Congregación ni goyoʼ más gaxca de lagary ro golésdo, goyoʼni gudx Chicago, ni biaʼan midid 32 kilómetros (20 millas). Ná scú, goyoʼdo reunión, né bisuʼdi más de la Biblia. Rasetnaladxi toibtica buelt Jetha buny comentar. Órni bicadiaga láabu, buni pensary: «Naʼ goona láani. ¿Xigony diti golísa ñaya?». Por ngú, desde dzúcu, gosalóya bisuʼdi xquiichi par reunión né buny comentar. Per ni máspa la, goniʼsa ló sentido espiritual, xomodca guirá buchi né bisana. Né ló íz 1941 goyonisa.

Rasetnaladxi toib samblia ni goyoʼdo lainy gudx Cleveland (Ohio) ló íz 1942. Xfamila biaʼan né stipnés famil lainy yoʼ lairy gaxca lagary ro goyoʼ samblia. Láaca stipnés hermanos né hermanas de más de 50 gudx xtuny Estados Unidos bicadiagyibu sambliacu por teléfono. Yása guilox Segunda Guerra Mundial ízcu, né buñ nigolú cuanal testigos xtuny Jehová. Por ngú, goxin herman goloʼ guii xcamión par nasaníni. Guiráyibu biiybu xtiitzni par ñaʼan toib buñ lainy tigaaga camión ni ñan lóodo guidopy gueʼel. Pal nabiʼyibu que moda noʼ riesga, herman nimaca nagoʼ guii foc xcamión né ñony silbaryibu né xcamionyibu. Laʼga ñac ngú, stipnés herman labúu ñeed ñacné layibu. Naʼ buni pensary: «Xcudx Jehová noʼyibu puext par nitisi cós». Diti góc xitcal, pór ngú labúu gotiasy sacró.

Chop tzón íz después, órni buni pensary ló sambliacu, biduʼdi cuent que xinaʼya diti goyoʼ ló galrrasaʼ nili bidzuiby. Láabu gopbu confianz lóo Jehová né ló xcudxbu. Dipa sialadxi ejemplo galán xtunybu.

Antes de sambliacu, xinaʼya góc precursor regular. Por ngú nigolú bicadiagtzaybu discurs ni goniʼ de precursor. Órni bibiguetdo lidxdo, láabu goniʼbu: «Ñoladxi ñacriya precursor. Per ¿ximod gaca láani né goni guirá mandad rioʼ?». Gonabdiitzbu lóodo pal labúu ñacnédo láabu, né gonido que labúu ñonydo láani. Por ngú gochbu tigaagado que nasiádo toib cuart o chop cuart antes de ñoosildo. Después ni soodo scuel, láabu bibiʼbu pal nayaa lidxdo né diti dxeretz xcósdo, né de ngú ma buny predicarbu. Ná nigolú goyoʼ xchiimbu, guirá ór goloʼbu cuent lóodo. Órni bibiguetdo lidxdo par guádo, guirá ór goyoʼbu cú né lóodo. Goyoʼ ór buny compañerdo láabu predicación después ni goyoʼdo scuel, né ngú gocné lóodo par ñando xi raduʼdy diitz gac buñ precursor.

Góca precursor órni gopa 16 íz. Ná bixiosa yása gacbu Testigo ízcu, goniiny ñanbu ximod rienni naʼ ló predicación. Toibtica goxin goodxi láabu que ná cayoni rutirigaʼlni naʼ, diti ma bidzela ni toib buñ ni ná nasuidy la  Biblia né naʼ. Né órcu gonabdiidza láabu: «¿Ñoladxlo nasuidylo la Biblia né naʼ la?». Bunybu pensary tipratien né cuapybu: «Diti noʼ ni toib razón par diti guisaguela». Scú laani, primer buñ ni bisuʼdi ni ná la Biblia, gócbu bixiosa. Ngú nigolú gosac par naʼ.

Bisuidydo ló libro ni laa «La verdad os hará libres». Conforma casuidydo, biduʼdi cuent que bixiosa gocné naʼ par nasuidytzaya xquiichi né labúu nasuʼdi stipnés ni ná la Biblia. Toibtica goxin, después ni bíildo toib párrafo gochbu naʼ: «Ndeʼ ni ná libro reʼ. Per ¿ximod nanlo que nigolúni?». Diti goona xi nacaabi, por ngú goodxi láabu: «Nigoreʼ diti naana xi gaabi looy. Per stoib dzú ni guisuidyno gaabi looy». ¡Né scú buni láani! Bidzela tipnés versículos ni goniʼ de tema ni gonido. Desde dzúcu, bisuʼdi goni investigar, né modcu ñoʼya puext par órni nasuidydo. Guirá ndeʼ gocnéni bixiosa né naʼ par naniʼsdo ló sentido espiritual. Láabu bisobbu ni bisuidybu né goyonisbu ló íz 1952.

Bireʼya lidxi órni gopa 17 íz. Casi ló ízcuca, Jetha a góc misionera né herman biruʼ Don ñee Betel. Guiropcayibu nigolú bioladxyibu asignación ni gopyibu, né gocnéyibu naʼ par ñoni ngúca. Por ngú bistzaaya solicitud par Betel né par Scuel de Galaad né bisiana láani ladxña Jehová. ¿Xí góc órcu? Ló íz 1946 herman biruʼ naʼ par ñaʼya Betel.

Ló guidopynac xcalnabáni ma gopa xidal asignaciones lainy Betel. Né raduʼdi guixquix portín por ngú ma bisuʼdi xidal cós copy. Por ejemplo, ma bisuʼdi cueʼya libros ló guiich, né láaca ma bisuidyibu naʼ goni dxiin ló contabilidad, né láaca bisuʼdi ximod nasiiya tipnés cós ni caquiindo lainy Betel né naxela stipnés cós ni rasac a stipnés lagary. Per ni más rioladxi de 75 íz ni cayoni dxiin lainy Betel, láani ngú mod rasuidy Jehová naʼ né xcalrracné adoración matutina né stipnés programas.

Láaca bisuʼdi xiroʼ de buch lahuina, Karl, ni bidxin Betel ló íz 1947. Galán bisuidybu xquiichbu né galán bisuidybu stipnés ni ná la Biblia. Toibtica buelt, gonaba láabu ñacnébu naʼ né toib discurs ni non natuʼdi. Goodxi láabu que gopa xidal información per dipa goona ximod natzaʼga láani saʼni. Láabu gocnébu naʼ, gonabdiitzbu naʼ: «Joel, ¿xí tema rareʼ loguiaʼ ló xtiscurslo?». Nimaca biduʼdi cuent ni goniiny ñaibybu naʼ: nosi non naquiinna información ni rareʼ loguiaʼ né nabeʼya stipnéscu tiplad. Dipa sialadxi ni bisuidybu naʼ.

 Par tzoʼno nakit lainy Betel, non guinino xtiitz Dios. Pal ronyno láani, sapno experiencias ni gony animar lóono. Por ejemplo, rasetnaladxi toibtica buelt cayony predicardo ti goxin lainy gudx Bronx, Nueva York. Toib hermano né naʼ goyguendo toib buñgonaʼ ni cuaʼ revistas La Atalaya né ¡Despertad! Gochdo láabu: Goxin reʼ caslooydo buñ toib cós ni sieed ló la Biblia ni labúu gacné layibu. Láabu cuapybu: «Pal nacni de la Biblia la, coltudy». Bíildo né bisuidydo xidal textos ni raniʼ de Gobierno xtuny Dios né gudxlio copy ni mápa mer guieed. Biduʼdydo cuent que bioladxbu láani, portín órni goyoʼdo stoib, biruʼbu xidal ximigbu. Después, láabu né tzeelbu bidxin gocyibu xpiin Jehová.

Ná goloʼya guica goni galtzeʼel, godudy 10 íz par nimbuya tzeʼela. ¿Xí láani gocné naʼ par nadzela toib gonaʼ tzaay ni ñac tzeʼela? Gonaba Jehová ñacné naʼ né gonabdiidza naʼ: «¿Xí nainy naʼ goni órni ma buni galtzeʼel?».

Órni bilox samblia ló íz 1953 lainy Estadio de los Yankees, bimbuya toib hermana ni góc laa Mary Aniol. Láabu né bisana goyeeyibu ni rarop Scuel xtuny Galaad né goniʼyibu xtiitz Dios toibsi. Mary goniʼbu né gan de dxiin ni bunybu lainy gudx Caribe né goniʼbu de buñ ni bisuidybu ni ná la Biblia ló guirá ízcu. Conforma bimbudo saʼdo, biduʼdydo cuent que guiropcado goniiny lóodo ñodieʼrado ló xchiin Jehová. Bioladxdo saʼdo né bunydo galtzeʼel ló abril íz 1955. Mary gócbu toib galrrascad ni biduʼdy Jehová naʼ né toib ejemplo galán par naʼ. Né bislooybu láani de xidal mod. Guirá ór goyoʼbu nakit né dxiin ni gopbu, nac nitisi dxiin ni gocni. Nadip bunybu dxiin, goyoʼbu galrrasaʼ por stipnés né guirá ór goloʼbu Gobierno xtuny Dios primer lagary (Mat. 6:33). Goyoʼdo ló galcircuit tzón íz, né ló íz 1958 herman biruʼ lóodo ñoʼdo Betel.

Bisuʼdi xiroʼ cós de Mary. Por ejemplo, de goló bunydo galtzeʼel, goloʼdo guicdo ñoldo toibsi la Biblia né ñoldo midid 15 versículos. Después ni tigaagado bíil toib midid, biiydo xtiitzni né bibiʼdo ximod nasobdo láani ló xcalnabánydo. Xidal buelt, Mary gochbu naʼ cós ni bisuidybu ló Galaad né ló guirá íz ni goyoʼbu xomod misionera. Ni bisuʼdi de láabu gocnéni naʼ par natuʼdi discurs galán né ñoni animar stipnés herman (Prov. 25:11).

Tzeʼel móza Mary goity ló íz 2013. ¡Nigolú raniiny naʼ guibiʼya láabu ló gudxlio copy! Laʼga guidxin dzúcu nainy naʼ guisuidyriya de Jehová né gapa confianz láabu né guidopy xcalnabani (Prov. 3:5, 6). Órni roni pensary ló guirá ni sony xcudx Dios ló gudxlio copy rony animarni naʼ né rabaladxi. Órni guidxin dzúcu, Xomextrano sasuidy lóono xiroʼ cós né sapno oportunida par guisuidyno más de láabu. Jehová ma bisuidy xiroʼ cós naʼ né ma bislooybu xcalrronladxbu naʼ de xidal mod, ná guiduʼdi guixquix láabu diti sigaʼlni ni ma biduʼdybu naʼ.