¿Ronylo pensary ximod nabanyno pal diti ñoʼ Govitz la? Por ni noʼ Govitz, yac rabeʼni xquixni, rabeʼni xquieʼni, racaa xcaani né napni ladxni. Láaca Govitz racnéni yac par cobni nís desde looni, né modreʼ nís radxinni dada ló xquixni.

Guié nacni toib galrrascad sacróyen ni bidudy Dios lóono. Por ni rac guié racaa ni radxiʼpno ló Gudxlio. Dios ronybu que gac guié, por láani ratopno xiroʼ cosech né rapno xiroʼ galrro par tzoʼ nakit xcalnabanyno.

Xidal buñ ni ma noʼ xiin rioʼyibu galrrasaʼ ximod guidudyibu galrro né lairy ni caquiin xfamilyibu. La Biblia ná: «Colguicaa cuidad manybiguin ni rasapy lainy guibá. Layimu diti ragoʼyimu binii, diti ronyimu cosech, né diti racuatzayibu cós lainy yee, per Bixiosto ni noʼ lainy guibá rayaʼan layimu. ¿Xí diti más rasacto que layimu la?» (Mateo 6:25, 26).

«Colguisuidy ximod nac lirios [...;] raabi lóoto que nili Salomón godoc lairy xomod láani dzú góc buñxirop. Por ngú, pal Dios radudy ni guac guirá guixien ni noʼ laidy dainy, [...] ¿xí diti noʼ más razón par guidudybu ni guacto la?» (Mateo 6:28-30).

Susica radudy Dios galrro né lairy lóono, láaca labúu guidudybu ni caquiinno. Órni rasobno Dios, rasiabbu xcalnasácbu ló xtem ni ronyno órni rayopyno ni guáno, láaca labúu guidudybu galnasác lóono par guidzelno dxiin né siino ni caquiinno (Mateo 6:32, 33).

Órni ronyno pensary ló Govitz, ló guié, ló manybiguin né ló guirá guieʼ, ¿noʼ xiroʼ razón par gandxiʼno Dios ja? Ló artículo ni sieed sasuidyno ximod goniné Dios buñgudxlio.