Mod ma bisuidyno ló artículo ni ma godudy, Jesús guirá ór goniʼbu «diitz sacró de Gobierno xtuny Dios» (Lucas 8:1). Bunybu xiroʼ xtem né gosaabu xiroʼ kilómetros par labúu nasuidybu buñ de Gobierno reʼ. Láaca guidapca Evangelios, ro ritlaa guirá ni bunybu órni goyoʼbu ló Gudxlio, ro ritlaa más de tigayoʼ buelt de Gobierno xtuny Dios, casi guiráni Jesús goniʼ láani. Per diti guirá buelt ni bisetlaa Jesús de Gobierno xtuny Dios rarecaa ló Evangelios (Juan 21:25).

¿Xigony nigolú gosac par láabu Gobierno xtuny Dios? Portín Dios golú láabu par gacbu rey de Gobiernocu (Isaías 9:6; Lucas 22:28-30). Diti bunybu láani par ñapbu galnadip o par guisanadx buñ láabu (Mateo 11:29; Marcos 10:​17, 18). Gopbu razón ni más rasac par naniʼbu de Gobierno xtuny Dios. Láabu gonbu né nanbu que Gobierno reʼ sony cós tzaay por guirá buñ ni más nadxiʼbu: Bixiosbu né xpiimbu. *

Jesús nadxiʼbu bixiosbu né guidopy xcalnabanybu (Proverbios 8:30; Juan 14:31). Radziguiaʼbu cualidades ni nap Bixiosbu xomod galnadxiʼ, galrronladx né justicia (Deuteronomio 32:4; Isaías 49:15; 1 Juan 4:8). Por ngú nigolú rianladxbu galrrascú ni raniʼ buñ de láabu. Por ejemplo, buñ raniʼ que Dios diti rioʼ galrrasaʼ por galrrioʼob ni cadudy buñgudxlio ló, né ni máspa la, raniʼyibu que Dios nap dool de guiráni. Ndeʼ nac toibtica razón por ni más goyodieʼ Jesús goniʼbu «diitz sacró de Gobierno xtuny Dios»: portín Gobierno reʼ gony nayaani laa Bixiosbu (Mateo 4:23; 6:​9, 10). ¿Ximod sonybu láani?

Gonybu xidal cós sacró par buñgudxlio. Jehová saquiin Gobierno reʼ par guisiaabu nís ni rareʼ bisaló guirá buñ. Sanitlóbu guirá cós ni rony que ribdxaʼno, «né ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob» (Apocalipsis 21:​3, 4). Gobierno xtuny Dios sony que guirá buñ ma diti sadudy ló galrrioʼob por tipzó.

Por ngú Jesús bisetlaa de Gobierno xtuny Dios, portín Gobierno reʼ saslooy que Bixiosbu nac toib Dios ni nap galrronladx né nap galnadip (Santiago 5:11). Per Gobierno reʼ diti nosi sony cós tzaay por Dios. Láaca sacnéni stipnés buñ ni ronladxbu: xpiimbu.

Antes ni ñeed Jesús ló Gudxlio, golésbu lainy guibá por xidal íz né Bixiosbu. Gocnébu Bixiosbu goyaʼ guirá cós ni noʼ: guirá vitzón né guirá galaxias ni rabiʼno. Gudxlio sacróyen ro rabésno né guirá nimalien ni noʼ loni (Colosenses 1:​15, 16). Per de guirá cós ni bisaʼyibu, Jesús nigolú biaʼbu né buñgudxlio (Proverbios 8:31).

Ndeʼ góc toib razón por ni buny predicarbu. Desde órni gosalóbu goniʼbu xtiitz Dios, goniʼbu que bieedbu ló Gudxlio par «naniʼbu diitz sacró» a guirá buñ ni caquiin láani (Lucas 4:18). Per Jesús diti nosi goniʼbu, láaca bunybu láani. Por ejemplo, órni bidop xidal buñ par nacadiag láabu, nigolú «binladxbu buñ por ngú bisialbu buñ ni caxoʼ» (Mateo 14:14). Láaca toib buñguieeu ni bixoné toib galguitz mal, gochbu Jesús: «Pal nainy looy, labúu guisiálo naʼ». Galnadxiʼ né galrronladx ngú bichiin Jesús, por ngú goniʼbu ndeʼ: «Nainy naʼ, góc nayaa», né órcu buñguieeucu bial (Lucas 5:​12, 13). Né órni bibiʼbu ximigbu María cayibdxaʼ por ni goity bisanbu Lázaro, «nigolú bioʼbni láabu», né «diti gosacbu sacró» né «gorudxaʼbu» (Juan 11:​32-36). Bunybu toib galrradziguiaʼ rodann: ná ma tap govitz de goloʼ goity Lázaro bunybu que Lázaro nabany stoib (Juan 11:​38-44).

Jesús gonbu que guirá galrradziguiaʼ ni bunybu diti gocni por tipzó. Nadxin dzú, guirá buñ ni bisialbu né ni golísbu lad gueʼet naxoʼ né ñaity. Láaca gonbu que guirá ni gony Gobierno xtuny Dios sácni por tipzó. Por ngú diti pórsi galrradziguiaʼ bunybu, xalagary ngú goyodieʼbu goniʼbu de Gobierno xtuny Dios (Mateo 9:35). Guirá galrradziguiaʼ ni buny Jesús bislooyni ni mápa mer gony Gobierno xtuny Dios ló guidopynac Gudxlio. ¿Xí láani gac? Ganno ximod rabexa la Biblia láani.

• Ma diti sioʼ galguitz.

  «Ló dzúcu, bisaló guirá buñ ni diti rabiʼ saxalni né guidiag buñgüet saxalni. Ló dzúcu, buñxot saxony xomod toib bidxin, né loch toib gop sacaʼ rudx de galrrabaladx». Láaca, «ni toib buñ saniʼ: Caxoʼya» (Isaías 33:24; 35:​5, 6).

• Sanitló galgoity.

  «Buñ ni rony xinésni xtunyibu sac gudxlio né sabanyibu loni por tipzó» (Salmo 37:29).

  «[Dios] sanitlóbu galgoity por tipzó, né Señor Jehová ni rony Mandary gudxlio né guibá saspiich nís ni rareʼ bisaló guirá buñ» (Isaías 25:8).

• Buñ ni ma goity siás lad guet.

  «Guirá ni noʼ lainy baʼ sien xirudxbu né sareʼyibu» (Juan 5:​28, 29).

  «Siás gueʼet» (Hechos 24:15).

• Guirá buñ sap lidx né sapyibu dxiin.

  «Sasaʼyibu yoʼ né sabésyibu lainyni; sasagaʼyibu labaa balach né sooyibu xcaani. Diti sasaʼyibu yoʼ né stoib sabés lainyni nili sasagaʼyibu yac cuánnax né stoib soo xcaani [...;] guirá ni ma golúya sabaladxyibu por guirá xchiinyibu» (Isaías 65:​21, 22).

• Ma diti sioʼ guerr.

  «[Dios] ranitlóbu guerr ló guidopynac gudxlio» (Salmo 46:9).

  «Gudxrop né gudxrop ma diti sadíil né ma diti sasuidyibu par tíilyibu ló guerr» (Isaías 2:4).

• Guirá buñ sap ni guá.

  «Gudxlio sadudy xcaa; Dios, Dios xtunyno, sadudy galnasác lóono» (Salmo 67:6).

  «Sioʼgolu ni guá buñ ló gudxlio, laidy dainy sioʼgoluni» (Salmo 72:16).

• Ma diti sioʼ buñ pobre.

  «Dios [...] dipa sialadx buñ pobre» (Salmo 9:18).

  «Sonladxbu buñdxo né buñ pobre, né salaabu buñ pobre» (Salmo 72:​12, 13).

Ni ma bisuidyno guirá ni gony Dios, ¿radudylo cuent xigony nigolú gosac Gobierno xtuny Dios par Jesús la? Goniʼbu de Gobierno reʼ a guirá buñ ni goniiny nacadiag láabu, portín gonbu que diti noʼ stoib ni labúu cueʼ galnagan xtuny buñ.

¿Rioladxlo guirá ni gony Dios la? Pal scú láani, ¿xí raquiin gonylo par guisuidylo de Gobierno reʼ? ¿Xí raquiin gonylo par labúu guicaʼlo guirá galnasác ni guitnébu? Ló stoib artículo sarexa galrranabdiitz reʼ.