«Labúu guixacladx buñ goʼol la Biblia, per labúu guixacladxlo órni diti nanlo ximod goʼolo láani», scá ná toib mbioxhlasien ni laa Wiil.

 ¿Nainy looy ganlo xí raquiin gonylo par guioladxlo goʼolo la Biblia la? Artículo reʼ sacnéni looy.

•  Buny pensary que noʼlo né layibu

•  Bisuidytzay xquiichlo

•  Ni raniʼ stipnés mbioxhlas

 Buny por guioladxlo goʼolo la Biblia modreʼ:

1.   Golú toib historia ni nainy looy guisuidylo. Labúu goʼolo toib historia, toib Evangelio o labúu guisuidylo grabación ni sieed ló la Biblia, né labúu guidzelo láani ló jw.org.

2.   Bíil historia cú. Labúu goʼolo láani toiblo fuers né xfamilo o ximiglo. Toibticayibu labúu gac de narrador né stipnés cú labúu goʼol guirá intervenciones ni sieed ló historia cú.

3.   Buny prueby toibtica de guirá sugerencias reʼ:

   •   Goleʼ toib dibuj de historia cú o xidal dibuj ni rasetlaa pu dzú gocni. Bicaʼ tipnés diitz ro ritlaa xi cayac.

   •   Órni goʼolo de toib buñ ni bisob a Jehová, bitzak ni bunybu né cualidades ni gopbu, né guirá galnasác ni cuábu.

   •   Órni goʼolo toib historia buny suusi cayony entrevistarlo layibu né láaca ngúca buny né buñ ni bibiʼ guirá ni góc.

   •   Pal toibtica buñ ni cayoʼolo historia xtuny, diti buny xinésni buny pensary ximod narecaabu pal ñonybu xinésni. Buny pensary xi gosaclóo Pedro órni diti bisetbu que rimbubu Jesús (Marcos 14:66-​72). ¿Xí láani non ñony Pedro órni buñ gonabdiitz láabu pal rimbubu Jesús?

   •   Pal noʼ gan xcalnabanylo, bicaʼ historia xtunylo né goleʼ láani ló historia ni sieed ló la Biblia. Láaca bicaʼ xi rasuidylo de historia cú (Romanos 15:4).

 Pal nanoy rasuidylo toib historia labúu sadzelo cós ni rasac loni. Rioʼ ór toib o chop diitz racnéni lóono guientzaayno láani.

 Por ejemplo, bitzak ni ná Mateo 28:7 né Marcos 16:7.

•    ¿Xigony bicaʼ Marcos que Jesús nareʼ nisló discípulos xtuny né «nisló Pedro»?

•  Ni gacné looy: Marcos diti goyoʼ órcu ralooypani Pedro góoch láani láabu.

•  Cós ni rasac ni sieed ló la Biblia: ¿Xigony bialdó xcalnabany Pedro órni gonbu que Jesús nainy guibiʼ láabu stoib? (Marcos 14:66-72). ¿Ximod bislooy Jesús a Pedro que nacbu toib amig ni nigolú? ¿Ximod labúu gonylo mod buny Jesús pal nainy looy gaclo toib amigdxin?

 Órni roʼolo toib historia né ronylo pensary que noʼlo né layibu né nanoy rasuidylo xquiichlo, rioladxlo goʼolo más la Biblia.