Después de toib curso nadip ni gocla gáay beʼo, 48 herman ni bisuidy ló Escuela Bíblica de Galaad de la Watchtower góc graduaryibu ló scuel reʼ, reunión reʼ gocni Patterson (Nueva York) lagary ro testigos xtuny Jehová ragoʼ scuel. Ló reunión reʼ bidxin 9.694 ximigyibu né xfamilyibu, né stipnés buñ ni buny compañer layibu ló graduación reʼ.

Desde íz 1943, más de 8.000 Testigos ma goyee ló scuel reʼ ni noʼ par misioneros. Libro ni raquiinyibu ló scuel reʼ ngú la Biblia, láani racnéni layibu par gac nadip fe xtunyibu né racnéni layibu gacyibu buñ ni labúu gony guantary guirá galnagan ni racaló toib misionero.

«Colgony pensary ló guirá cós ni nap galrronladx.» Ni gosaló reunión reʼ góc Anthony Morris, toibtica de Tidxó Buñ ni nap xiroʼ Galnann ni Rasanir nisló testigos xtuny Jehová. Gosalóbu xtiscursbu né Filipenses 4:8, ni ná: «Guirá cós [...] ni nap galrronladx, [...] diti guisianto gonyto láani».

Hermano Morris goniʼ que par diti guireʼganno por guirá cós mal ni rac ló gudxliogoxreʼ raquiin gonyno pensary ló cós ni nap galrronladx. Né ndeʼ biduidybu diitz: «Puext coltzoʼ né colguiyopy guirá cós ni nap galrronladx; láaca lóocato colgac buñ ni nap galrronladx».

Ló ndeʼ guiráno non guisuʼno mod nac Bixiosno ni noʼ guibá, láabu diti nosi rabiʼbu púti rachéno (Salmo 130:3). Hermano Morris bilitzbu herman scareʼ: «Diti nosi guibiʼto púti raché saʼto, colgony rutirigaʼlni lóoto par que layibu gonladxyibu lóoto».

«Colgap galnann per diti gacto buñ ni nigolú rony xinésni.» Harold Corkern, toib anciano ni rasanir nisló Betel ni noʼ Estados Unidos, gosalóbu xtiscursbu né diitz ni sieed ló Eclesiastés 7:16. Ná Dios raniiny gapno galnann né guiquiinno láani, láabu diti rioladxbu guiatzgoluno por ni nanno.

Hermano Corkern láaca goniʼbu xigony raquiingoluʼ gapno galnadxiʼ órni guilitzno buñ. Diti non guinabno que xhermanno gony más cós ni Jehová diti canab layibu. Hermano cú goniʼ: «Pal lóoto raquiinto galán xcalnanto né mod riento guirá cós, xhermanto sonladx lóoto».

«Diti guialadxto ni Dios rony.» (Salmo 78:7.) Hermano Guy Pierce, ni nac Tidxó Buñ ni nap xiroʼ Galnann ni Rasanir nisló testigos xtuny Jehová, gosalóbu xtiscursbu né goniʼbu que mod rony toib bimbiox raslooyni mod nac bixiosbu (Proverbios 20:11). Né mod cuca, mod nacno raslooyni mod nac Jehová, ni nac Dios xtunyno né Bixiosno. «Noʼ toib mod ganno chú ngú guirá xiin Dios né chú ngú guirá xiin Buñdzab: Guirá ni diti rony xinésni diti sieed de Dios, láaca ni diti nadxiʼ buch.» (1 Juan 3:10.)

Hermano Pierce buny que nasetnaladxyibu que guiráyibu bieedyibu scuel de Galaad por ni nacyibu buñdxo, né hermano cú góoch layibu que diti guisianyibu gacyibu buñdxo. Ni layibu bieedyibu scuel reʼ diti raduidyni diitz que más rasacyibu que stipnés herman; xalagary ngú scuel reʼ bisuidy layibu gacnéyibu guirá herman ni noʼ ló guidopynac Gudxlio par láaca labúu gac buñdxo (Salmo 133:1). Hermano Pierce goniʼ: «Nigoreʼ ni ma bisuidygoluʼto ló scuel reʼ: diti guisianto guisuidyto de Jehová né guimbuto láabu más».

«Ni ma bunydo, ngú ni non gonydo.» William Samuelson, ni nac superintendente del Departamento de Escuelas Teocráticas, gonabdiitzbu: «¿Ximod guibiʼno dxiin ni racaʼno pal nacni toib dxiin ni diti nainy lóono gonyno?». Guibiʼno xi rasuidy lóono guirá diitz ni sieed ló Lucas 17:7-10: «Órni lóoto ma bunyto guirá cós ni cuacuento colguiniʼ: Nacdo mós ni diti raquiin par xitcal. Ni ma bunydo ngú ni non gonydo». Nigolú láani pal natzakno xchiinno né dxiin ni rony xpixuanno Jehová, diti noʼ pu raquiinno.

Guirá herman ni goyee scuel reʼ guidopynac xomal bisuidyibu lagary roʼ goyoʼ scuel cú. Né tipnés gosac nagann láani. Hermano Samuelson goniʼ: «Guiráto bunyto ni non gonyto. Nigoreʼ ni ma biduidyto cuent que scuel reʼ gocné lóoto, fe xtunyto gocni más nadip». Láabu bisloʼoxbu xtiscursbu né diitzreʼ: «Ni lóoto gonyto xchiin ni rony Mandary ló Gudxlio né guibá xomod mós, guibiʼto láani xomod toib dxiin ni rasacgoluʼ».

«Colguisetnaladx guirá ni Jehová ma goniʼ órni guicalóto galnagan.» Sam Roberson, superintendente auxiliar del Departamento de Escuelas Teocráticas, góoch layibu que sioʼ ór moda sareʼganyibu. Né por ngú gochbu guirá herman reʼ que guisuidyibu historia de stipnés buñ ni cuaʼ xcalrracné Dios. Napno ejemplo xtuny Moisés órni laabu gochbu a Josué diitzreʼ: «Jehová [...] sioʼbu né looy diti sasiambu looy né diti sialadxbu looy» (Deuteronomio 31:8). Órni ma yaaca gaity Josué goniʼbu diitzreʼ: «Ni toib diitz de guirá diitz galán ni Jehová Dios xtunyto góoch lóoto diti biaʼantani» (Josué 23:14).

Jehová raduidy xtiitz guirá buñ ni rony ni nábu: «Dipa sasiana looy, né diti sioʼ dzú sialadxi looy» (Hebreos 13:5). Láabu raibybu lóono que saliskiaʼbu mod rarexa laabu («Láabu Ronybu que Guidxin Gac») que láacabu radxin racbu ni cayac falt par gacnébu buñ ni rony ni nábu. Hermano Roberson goniʼbu diitzreʼ: «Diti guireʼganto, diti guidzagto. Colguisetnaladx que Jehová dipa sialadxbu lóoto».

«Ló guidopynac gudxlio bieen ruid ni bunyibu.» (Romanos 10:18.) Mark Noumair, toibtica mextra ni goloʼ scuel cú biduidybu toib discurs ro herman ni sieed de xidal gudx goniʼyibu xi gosacloyibu órni casaabu yoʼ por yoʼ gahxca Patterson. Toib galtzeʼel de gudx Sudáfrica ni casaa yoʼ por yoʼ bidzelyibu tzón buñgonaʼ de xcudxyibu né bibaladxyibu portín goninéyibu buñgonaʼ reʼ ló diitz zulú né xhosa. Toib galtzeʼel de gudx Sri Lanka bidzelyibu toib buñguieeu de gudx India, xiin buñguieeu reʼ né tzeelbu rabés gudx Sri Lanka. Buñguieeu cú dipa ma bibiʼbu toib Biblia, né por ngú galtzeʼel reʼ bisiané toibtica Biblia xtuny láabu.

«Tzoʼno puext par gonyno guirá dxiin galán.» Gene Smalley, toibtica ni racné Comité de Redacción, buny entrevistarbu a chop galtzeʼel ni goyoʼ ló scuel reʼ. Toibtica galtzeʼel ni nac de gudx Sierra Leona goniʼyibu que guirá dzú bituidyibu nís dada riolidxyibu per diti gosac naganyibu láani por ni bisuidyibu 50 buñ ni ná la Biblia. Guiropca galtzeʼel reʼ biduidyibu guixquix por ni bisuidyibu ló scuel reʼ portín scuel reʼ bisuidytzay layibu «gonyibu dxiin galán» ló dzú ni sietra (2 Timoteo 3:16, 17).

«Colgony guantary dada guiloxni.» Gerrit Lösch, toibtica de Tidxó Buñ ni nap xiroʼ Galnann ni Rasanir nisló testigos xtuny Jehová gosalóbu xtiscursbu ro golexabu que guirá buñ ni raxony rayopyibu mod par diti guidzagbu né modreʼ gony guantarybu par guiloxbu carrera cú sacró. Ná ló carrera cú nosi toib buñ rony gan, ló carrera ro cayony adorarno Dios guirá ni rony guantary né rasloʼox láani rony gan.

Par lóono ni rony adorarno Dios, ni gony guantaryno raduidyni diitz gony adorarno Dios sin guidzagno, sin guiduidyno lagary que galnagan, galrrioʼob, prueby, cós mal gonyni que guireʼganno. Jesús goniʼ scareʼ: «Ni sony guantary dada dzú guidxin fin salaa» (Mateo 24:13). ¡Balaati rony animarni lóono ni nanno que Jehová né Jesús láaca rasac par layibu ni lóono rony guantaryno! De ngú, hermano Lösch bisetlabu tipnés puntos ni labúu gacné lóono gony guantaryno ná noʼ galnagan. Tipnés cós ni labúu gacné lóono ngú ndeʼ:

• Guininéno Dios «ni racné» lóono né «ni guirá dzú roʼoy xquiʼxno» (Romanos 15:5; Salmo 68:19).

• Coʼno guicno dipa guisianno Jehová portín «Dios nac fiel, né diti saduidybu lagary tudyto ló prueby ni diti labúu gony guantaryto, órni ma noʼto ló prueby láabu sayopybu mod par guireʼto loni né gony guantaryto láani» (1 Corintios 10:13).

• Guinasdxichno esperanza ni napno. Xomod Jesús ni lóono rasuʼno, la Biblia ná: «Por ni láabu gonbu que sioʼbu goxt buny guantarybu yac nadop» (Hebreos 12:2).

Hermano Lösch goniʼbu que diti labúu guireʼganno nigoreʼ portín ma yaaca guisloʼoxno carrera xtunyno. «Gony guantaryno guixonyno carrera ni náaxh nislóno.» (Hebreos 12:1.)

Toibtica ni góc graduar bisloʼoxbu programa reʼ órni bíilbu toib guiich ro guiráyibu bicaʼ xí ni rasac por ni bieedyibu scuel re, ló guiich reʼ biduidyibu guixquix por galán scuel ni gopyibu. Láaca golexayibu que modpa cuá la Biblia diti nosi gocnéni layibu par ganyibu xi raniiny Dios gony, láaca buny nadipni fe xtunyibu. Guiich cú ná: «Noʼdo puext guisobdo guiráxadit ni lóodo bisuidydo».