LECCIÓN 7
¿Bixhen Yeleunabia che Dios?
1. ¿Bixhen Yeleunabia che Dios?
¿Bixchen wake nhachho deke tuze Jesús nabie wench? (MARCOS 1:40-42)
Nhaken tu yeleunabia de zu yaba nha ba zu galze yunhiten yuge yeleunabia che benach nha gunhen dek gake kan chhaklhalle Dios lhau Yellʼlhiu nha yaba. Yeleunabia che Dios, yeleunabia den lliaxjed benach, gunhen deke nite txen yuge bene nhite lhau Yellʼlhiu nhi. ¿Keʼ nhaken dille wen? Blhab Lucas 1:33; 11:2; Marcos 13:10.
Lhau yuge yeleunabia lliaxj tu bene nebia, Jeoba ba bllie Xhine, Jesucristo, ka Rey che Yeleunabia chie. Blhab Apocalipsis 11:15.
2. ¿Bixchen tuze Jesús wake nabie wench?
Tuze xhin Dios wake nabie wench le nhake bene llilhalle nha tuliteze chhunhe den nhake de tuli (Mateo 11:28-30). Lekseka, nhape yelewak par gaklhenhe bene, nha uchinhen kate nabie Yellʼlhiu desde yaba. Le kate bebanhe, Jesús bewe yaba, ga blheze kuit Dios axtu ke bnexjwe leʼ yelewak par nabie. Blhab Hebreos 10:12, 13.
3. ¿Yesenabia bene yoblhe lhen Jesús?
Biblia shnan deke Jesús nabie txen lhen bale bene wen llin che Dios. Le Daniel 7:27 nsie le santos o bene ba blle Dios. Bene nech ben blle Dios sjanhake apóstol che Jesús. Jeoba axtu nella ne llbie bene byio nha nhulhe ben chhejle chie par yesenabie lhen Jesús. Ka Jesús, bene ki shjayake yaba kate sate nha yesezie tu cuerp de nhake ka be bxin. Blhab Juan 14:1-3; 1 Corintios 15:42-44.
¿Bale shjayak yaba? Jesús bnhe dek tu chupze bene, nha nsie leʼ dille xtilh «rebaño pequeño» (Lucas 12:32). Yuge beneki ben yesenabie txen lhen Jesús lhau Yellʼlhiu sjanhake 144.000. Blhab Apocalipsis 14:1.
4. ¿Bi guke kate Jesús bzulhaw shnabie?
Jesús bzulhaw shnabie iz 1914, nha de nech de benhe blheje Daxiwe nha angl malh ben nhite yaba nha bzalen Yellʼlhiu. * Shlukchwan, Daxiwe blheken da zed dulhu yellʼlhiu (Apocalipsis 12:7-10, 12). Desde kanha, ba byale de malh den chhak yellʼlhiu. Udilhe, bedxhu, yillwe nha win den deʼ nella shluen dek chhak kan ba nyoj le Biblia dek yeleunabia che Dios ba zu galze nabian lhau Yellʼlhiu. Blhab Lucas 21:7, 10, 11, 31.
5. ¿Bi chhun yeleunabia che Dios nella, nha bi gunhen de ze za?
Yeleunabia che Dios chhetuben zan bene lhau zan yell, chhuxklhen den chheselhueide Xtille Dios dulhu Yellʼlhiu. Zan bene byio nha nhulhe bene lhalldaw wen ba sjanhake bene wen llin che Jesús nha chhesezenhage chie. Yuge bene ki yeseilhe kate yeleunabia che Dios ulliayin yellʼlhiu malh nhi. Shi chhaklhallechho zichho banhez den gun yeleunabia che Dios, chheyale uzenhagchho cheJesús. Blhab Apocalipsis 7:9, 14, 16, 17.
Shlak tu mil iz, Yeleunabia nhi gunhen kan guklhalle Dios gak desde nech par benach. Yellʼlhiu yeyaken tu paraíso. Kate llin lla, Jesús yenhexjwe Yeleunabia Xeʼ (1 Corintios 15:24-26). ¿Chhaklhallo ushaljo che Yeleunabia nhi lhen bene yoblhe? Blhab 2 Pedro 3:13.
^ par. 6 Shi zelhallo nezeshdo wia nota 22 den za lage yish 217-220 che libr ¿Qué nos enseña la Biblia?
