Umbukiso 1 Wezithombe ZasePhilippines (Ka-February 2014 Kuya Ku-May 2015)
OFakazi BakaJehova bakha izakhiwo ezintsha futhi balungisa nebezikhona ehhovisi legatsha lasePhilippines, eQuezon City. Njengoba izincwadi zasePhilippines sezinyatheliswa egatsheni laseJapane, isakhiwo obekunyatheliswa kuso siye senziwa isakhiwo soMnyango Wezama-computer, owe-Local Design/Construction (LDC), uMnyango Wokunakekela Izakhiwo, uMnyango Wokuthumela Izincwadi noMnyango Wokuhumusha. Lo mbukiso wezithombe ubonisa eminye yemisebenzi eyayenziwa esakhiweni okwakungesokunyathelisa nakwezinye izakhiwo phakathi kuka-February 2014 no-May 2015. Kulindeleke ukuba lo msebenzi uphothulwe ngo-October 2016.
Umdwebo obonisa igatsha lasePhilippines lapho seliphothuliwe. Izakhiwo ezakhiwayo noma ezilungiswayo zihlanganisa:
ISakhiwo 4 (ISakhiwo Sokuhlala)
ISakhiwo 5 (UMnyango We-audio/video noMnyango Wenkonzo)
ISakhiwo 6 (UMnyango Wokulungiswa Kwegceke, uMnyango Wokulungisa Izimoto noMnyango Wokushisela)
ISakhiwo 7 (UMnyango Wezama-computer, i-LDC, uMnyango Wokunakekela Izakhiwo, uMnyango Wokuthumela Izincwadi noMnyango Wokuhumusha)
February 28, 2014—ISakhiwo 7
Izisebenzi zesikhashana zifaka i-fiberglass entsha ezikhwameni ukuze ziyivikele emswakameni. Zigqoke izinto ezivikelayo ukuze zivikele isikhumba.
April 2, 2014—ISakhiwo 7
Izisebenzi ziqedela uphahla lwendlu yokuqopha uLimi Lwezandla LwasePhilippines. Izikhala eziyizikwele ophahleni zizofakwa ama-HVAC diffuser, asiza ekutheni umoya opholile ugcwale kuso sonke i-studio.
October 21, 2014—Isakhiwo SaseQuezon City
Kuyambiwa ukuze kufakwe amapayipi amanzi abandayo. La manzi azofinyelela kuzo zonke izakhiwo zegatsha.
December 19, 2014—Ibhuloho labahamba ngezinyawo elixhumanisa iSakhiwo 1, 5, neSakhiwo 7
Leli bhuloho elisha elivalekile lizoxhumanisa zonke izakhiwo ezinkulu, kuhlanganise neSakhiwo 1, lapho kunegumbi lokudlela khona. Leli bhuloho liyoba usizo ngokukhethekile kubantu abangaphezu kuka-300 abasebenza eSakhiweni 7.
January 15, 2015—ISakhiwo 5
I-crane engamathani angu-50 iphakamisa othayela bokufulela. Ama-crane ashiyanayo ngobukhulu ashayelwa abantu bendawo abaqashiwe.
January 15, 2015—ISakhiwo 5A (Circulation pod)
Isakhiwo esinezitezi ezimbili, esingamamitha-skwele angu-125, sinezindlu zangasese ezimbili, izitebhisi nekheshi. Ukuba nezindlu zangasese kulesi sakhiwo kwenza kube nendawo eyengeziwe eSakhiweni 5 esiseceleni. Ukufaka ikheshi kulesi sakhiwo, kunokulifaka eSakhiweni 5, kuqinisekisa ukuthi umsindo wekheshi awuphazamisi ukuqoshwa kwama-video nezinto ezilalelwayo.
January 15, 2015—ISakhiwo 5A (Circulation pod)
Izisebenzi zifaka izinsimbi zingaphansi komthunzi. Emini amazinga okushisa avame ukufinyelela ku-29° ngo-January bese kuthi ngo-April afinyelele ku-34°.
March 5, 2015—ISakhiwo 5
Iqembu lezisebenzi lihlanganisa amapulangwe okwenza uphahla. ESakhiweni 5, kwasetshenziswa izingodo ezingaba ngu-800.
March 17, 2015—ISakhiwo 5
Kuxovwa usimende ngezandla ukuze kwenziwe umsebenzi ongatheni. Phakathi kwalabo abasizayo kulo msebenzi, kukhona izisebenzi ezingaphezu kwekhulu ezivela e-Australia, eCanada, eFrance, eJapane, eNew Zealand, eNingizimu Korea, eSpain, e-United States nakwamanye amazwe.
March 25, 2015—ISakhiwo 5
Kufakwa izinsimbi ophahleni lweSakhiwo 5, esasisetshenziswa uMnyango Wokuhumusha. Lesi sakhiwo siyalungiswa ukuze sisetshenziswe uMnyango We-audio/video noMnyango Wenkonzo.
May 13, 2015—ISakhiwo 5
Osebenza ngensimbi usaha izinsimbi ezizosetshenziselwa ukwakha izindonga zamahhovisi.
Okunye Ongase Ukuthande
IMISEBENZI YOKWAKHA
Kwakhiwe AmaHholo OMbuso Ayinkulungwane Futhi Kusadingeka Amanye
OFakazi BakaJehova ePhilippines baqopha umlando ngohlelo lwabo olukhethekile lokwakha amaHholo OMbuso.
IMISEBENZI YOKWAKHA
OFakazi BakaJehova—Ukwakha Ngaphandle Kokuvinjelwa Yimingcele
Abantu BakaJehova abanobunye banqoba imingcele yamazwe, eyamasiko neyolimi ukuze bakhe amaHholo OMbuso kanye nezinye izakhiwo, kube udumo kuJehova.