Eyesibili YeziKronike 26:1-23
26 Ngemva kwalokho bonke abantu bakwaJuda bathatha u-Uziya, + owayeneminyaka engu-16 ubudala, bambeka waba inkosi esikhundleni sikayise u-Amaziya. +
2 Walakha kabusha i-Eloti + walibuyisela kuJuda ngemva kokuba inkosi* isingcwatshwe nokhokho bayo. +
3 U-Uziya + wayeneminyaka engu-16 lapho eba inkosi, wabusa eJerusalema iminyaka engu-52. Igama likanina kwakunguJekoliya waseJerusalema. +
4 Waqhubeka enza okulungile emehlweni kaJehova, njengoba nje uyise u-Amaziya ayenzile. +
5 Waqhubeka efuna uNkulunkulu ezinsukwini zikaZakariya, owamfundisa ukwesaba uNkulunkulu weqiniso. Phakathi nesikhathi ayefuna ngaso uJehova, uNkulunkulu weqiniso wamenza wachuma. +
6 Waphuma walwa namaFilisti + wafohla udonga lwaseGati, + udonga lwaseJabine + nodonga lwase-Ashidodi. + Ngemva kwalokho wakha amadolobha endaweni yase-Ashidodi naphakathi kwamaFilisti.
7 UNkulunkulu weqiniso waqhubeka emsiza ekulweni namaFilisti, ekulweni nabase-Arabhiya + ababehlala eGuribhali nasekulweni namaMeyuni.
8 Ama-Amoni + aqala ukukhokha ku-Uziya. Ekugcineni udumo lwakhe lwasakazeka lwaze lwafika naseGibhithe, ngoba waba namandla ngendlela emangalisayo.
9 Ngaphezu kwalokho, u-Uziya wakha imibhoshongo + eJerusalema ngaseSangweni Elisekhoneni, + eSangweni Lesigodi + nangaseNsikeni, wayiqinisa.
10 Ngaphezu kwalokho, wakha imibhoshongo + ehlane wamba* imithombo eminingi (ngoba wayenemfuyo eningi); wenza okufanayo naseShefela nasendaweni eyithafa. Wayenabalimi nabagcini-zivini ezintabeni naseKarmeli ngoba wayezithanda ezolimo.
11 Ngaphezu kwalokho, u-Uziya waba nebutho eliqeqeshelwe impi. Laliphuma liye emikhankasweni yempi lihlelwe ngezigaba. Lalibalwa futhi libhaliswa + uJeheyeli unobhala + noMahaseya isikhulu esingaphansi kokulawula kukaHananiya, esinye sezikhulu zenkosi.
12 Sezizonke izinhloko zemindeni yoyise ezazengamele la maqhawe anamandla zazingu-2 600.
13 Amabutho empi angaphansi kwazo ayehlomile elungele impi ayengu-307 500, amabutho empi anamandla asekela inkosi ekulweni nezitha. +
14 U-Uziya wahlomisa lonke ibutho ngamahawu, ngemikhonto, + ngezigqoko zokuzivikela, ngamajazi ensimbi, + ngemicibisholo nangamatshe endwayimane. +
15 Ngaphezu kwalokho, eJerusalema wenza imishini yempi eyayiklanywe onjiniyela; yayibekwe emibhoshongweni + nasemakhoneni ezindonga futhi yayikwazi ukukhipha imicibisholo namatshe amakhulu. Ngakho udumo lwakhe lwasakazekela ezindaweni ezikude ngoba wathola usizo olukhulu futhi waba namandla.
16 Nokho, kwathi nje lapho esenamandla, inhliziyo yakhe yazidla umphumela kwaba ukulimala kwakhe, akathembekanga kuJehova uNkulunkulu wakhe ngokungena ethempelini likaJehova ukuze ashise impepho e-altare lempepho. +
17 Ngokushesha nje u-Azariya umpristi nabanye abapristi bakaJehova abangu-80 abanesibindi bamlandela.
18 Bakhuluma neNkosi u-Uziya bathi: “Uziya, akufanele ushisele uJehova impepho! + Ngabapristi kuphela okufanele bashise impepho ngoba bayinzalo ka-Aroni, + bangcwelisiwe. Phuma endlini engcwele ngoba awuthembekanga futhi uJehova uNkulunkulu ngeke akukhazimulise ngalokhu.”
19 Kodwa u-Uziya, owayephethe umcengezi wokushisa impepho, wathukuthela kakhulu; + ekuthukutheleleni kwakhe abapristi, kwavela uchoko + esiphongweni sakhe phambi kwabapristi endlini kaJehova eceleni kwe-altare lempepho.
20 Lapho u-Azariya umpristi omkhulu nabo bonke abapristi bephendukela kuye, babona ukuthi wayeshaywe ngochoko esiphongweni! Ngakho bamkhipha ngokushesha lapho, naye washesha waphuma ngoba uJehova wayemshayile.
21 INkosi u-Uziya yaqhubeka inochoko yaze yashona, yayilokhu ihleli endlini yayo yodwa ngenxa yokuthi yayinochoko, + ngoba yayehlukanisiwe nendlu kaJehova. UJothamu indodana yayo wayengamele isigodlo,* ahlulela abantu bezwe. +
22 Wonke omunye umlando ka-Uziya, kusukela ekuqaleni kuze kube sekugcineni, walotshwa umprofethi u-Isaya + indodana ka-Amozi.
23 Ngemva kwalokho u-Uziya washona, wangcwatshwa kanye nokhokho bakhe, kodwa ensimini yokungcwaba yamakhosi, ngoba bathi: “Unochoko.” UJothamu indodana yakhe + waba inkosi esikhundleni sakhe.
Imibhalo yaphansi
^ Okuwukuthi, uyise u-Amaziya.
^ Kungenzeka wayimba edwaleni.
^ Noma, “indlu yenkosi.”
