ISIMISO SEBHAYIBHELI: “Gqokani uthando, ngoba luyisibopho esiphelele sobunye.”—Kolose 3:14.

IZINZUZO: Uthando okukhulunywa ngalo kakhulu eBhayibhelini akulona olwezithandani noma olobulili. Kunalokho, uthando olusekelwe ezimisweni futhi olunezimfanelo ezinjengozwela, ukuthethelela, ukuthobeka, ubuqotho, umusa, ubumnene nokubekezela. (Mika 6:8; Kolose 3:12, 13) Ngokungafani nothando lokuthatheka lwezithandani oluvame ukuphela ngokuhamba kwesikhathi, uthando olusekelwe ezimisweni lungaqhubeka lukhula kuze kube nini nanini.

UBrenda, oseneminyaka ecishe ibe ngu-30 eshadile, uthi: “Uthando abantu abasanda kushada abasuke benalo ngomunye nomunye, alulutho uma luqhathaniswa nothando eniba nalo njengoba iminyaka ihamba.”

USam, indoda esineminyaka engaphezu kwengu-12 ishadile, waphawula: “Mina nomkami ihlale isithokozisa—ize isimangaze indlela iseluleko seBhayibheli esisebenza ngayo, nokulula ngayo ukusisebenzisa! Uyasisebenzisa bese zonke izinto zihamba kahle. Kodwa, naphezu kokuba ngifisa ukuthi ngihlale ngisisebenzisa, ngezinye izikhathi ngiyahluleka, njengalapho ngizizwela ngokweqile, ngizicabangela ngaphezu kwabanye, noma ngikhathele. Ngezikhathi ezinjalo ngicela uJehova ukuba angisize ngisuse noma imiphi imizwa engakhi. Ngibe senganga umkami, futhi kungakapheli sikhathi kuvele kube sengathi akukho lutho olubi olwenzekile!”

UJesu Kristu wathi “ukuhlakanipha kubonakaliswa kulungile yimisebenzi yako.” (Mathewu 11:19) Kungaleso sizathu iBhayibheli linazo zonke izimpawu zokuhlakanipha kwangempela. Izimfundiso nezimiso zalo ziyasebenza. Aziphelelwa isikhathi. Zidlulela ngalé kwemingcele yobuzwe namasiko. Zibonisa ukuyiqonda ngokujulile indalo engabantu kangangokuthi kuyacaca ukuthi uMthombo wazo uphakeme—uMdali wethu uJehova uNkulunkulu. Ngokuqinisekile, ubufakazi sibubona lapho sizisebenzisa. Yingakho iBhayibheli lisimema ukuba ‘sinambithe sibone ukuthi uJehova muhle.’ (IHubo 34:8) Ingabe uzosamukela leso simemo?