Ngonyaka ka-33 C.E., uJesu wafa, wavuka kwabafileyo, wanyukela ezulwini. Kamuva, wanikezwa igunya lokubusa njengeNkosi. (Daniyeli 7:13, 14) Esikhathini esizayo, njengeNkosi uJesu uzoletha ukuthula emhlabeni aqede nobumpofu.—Funda iHubo 72:7, 8, 13.

UJesu uzokwenza izinto ezimangalisayo njengoMbusi wabantu. Uzosebenzisa amandla awanikezwe uYise ukuze enze abantu babuyele esimweni sokuphelela. Bayojabulela ukuphila emhlabeni, bangaphinde baguge noma bafe.—Funda uJohane 5:26-29; 1 Korinte 15:25, 26.

Manje uJesu uqondisa umsebenzi wokushumayela emhlabeni wonke owenziwa abalandeli bakhe beqiniso. Bavakashela abantu bababonise lokho iBhayibheli elikushoyo ngoMbuso kaNkulunkulu. UJesu wathi uyoqhubeka esekela umsebenzi wabafundi bakhe kuze kube yilapho uMbuso kaNkulunkulu uqeda ohulumeni babantu.—Funda uMathewu 24:14; 28:19, 20.

Ngebandla lobuKristu leqiniso, uJesu uqondisa abantu endleleni engcono yokuphila. Uyoqhubeka ebaqondisa lapho kubhujiswa lesi simiso sezinto abayise ezweni elisha elithenjiswe uNkulunkulu.—Funda eyesi-2 Petru 3:7, 13; IsAmbulo 7:17.